Pyrchah kiwa chong chnong Sonapyrdi waka KSU yei wan booh thaw sah ki BSF khlem da yoh bor

Jowai: Ynne ka sngi ka 28 tarik, kiwa chong chnong Sonapyrdi hapoh i yahkhmat u Daiapherbha Lamare, Secretary chnong wa u N. Mynthoi, Chairman ka chnong Sonapyrdi deilang waka KSU Sonapyrdi Unit hapoh i yahkhmat u General Secretary u WD Gympad, u KS Suchiang, President KSU Narpuh Circle deiwa kyrchaan lang ki dkhot na ka KSU Khliehriat Circle, da lai yachem ki ya u Superintendent of Police (SP) EJHD hajrong i booh thaw sah ki BSF ha chnong Sonapyrdi khlem da yoh yutip ki bor chnong næ ki tre thaw.

Haka ujor wa da e cha u SP, ka chnong Sonapyrdi wa ka seiñ da dawa ki wow kyrriah noh syndon ya kitai ki BSF na katai ka thaw. Deiwa ong leh wa ki chipai BSF toh u em ki ha ki bynta khappood (Border) yong kawon kawon ka ri, kammon won da yoh laad ki wow em hapyrdi chnong, da ong u Daiapherbha Lamare.

Da pyntip u leh wa ki tre thaw leh da khyrngiat ki wow yoo da ki BSF kiwa da wan sah khlem da yoh bor naka chnong.

Hawa yaklam wa u SP, da ong u wa ki BSF emhok ki wow leh Patrolling tangwa ym em hok ki wow chong dooh næ wow chna thaw sah. U SP da ong u leh wa ki pulit toh u emlang ki wa ki BSF ha i lai Patrolling næ khynra ya kiwon kiwon ki kari wa suba wa em i thmu wow leh sih. Neiliang yong oo daw phah u ya ki pulit Lumshnong wow lai sylli wei hadien itæ daw leh ya iwa emkaam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hawa yaklam wa u KS Suchiang, President KSU Narpuh Circle da pynkynmoo u wa ha ki snem wa da dep ki BSF da wan ki wow chna thaw sah haka jooh ka thaw, tangwa ka chnong da ujor ko cha ki bor synchaar District wei da kyrriah ya ki. Da ong chooh chooh wa i em ki BSF ym wanrah myntoi ko iyi iyi, wanrah pathan ko ya i wym sñiaw chngaiñ ya ki tre chnong wa lai wa wan wei khamtam ya ki kynthai. Ini da dep da jia ha ki por wa nachwa heiwa ki BSF warim kiwa em ha kitu ki por da tba kti ki ya ki tre chnong wei klam khlem akor ki leh ya ki kynthai hawa da dep muaid kiad ki wei da mih ka kulmar ha katu ka por hapyrdi ki tre chnong wa ki BSF.

Ka kyrwoh na u TL Gympad Asst. Secretary chnong Sonapyrdi wa u SL Suchiang Asst. Genl. Secy. KSU Sonapyrdi Unit.