Ka KSU-EJHDU ha ka 7 tarik hadien wa da pynbna da u Montri Rangbah ka jylla wa da em i thooh bniah ya ki laad wow wanrah luti rel cha East Jaiñtia Hills District, neiliang ka seiñ da lai e dorkhat ko ha u DC ka District yow pynsñiaw yei pyrchah.
Ka seiñ da yieñ skem ko hajrong ka yurim wa kat wym pu em ki aiñ kiwa khlan wow yada ya ka jaitbru khian paaid, i yaklam hajrong ka luti rel toh u sangeh chwa. Ka seiñ da ong ko leh nadooh u snem 1988 da pyrchah ko ya ini i thmu ka sorkar wow yooh beiñ ya ka jaitbru wei u pyrchah ko katwa ka sorkar ym pyrkhat ko ya ki aiñ kiwa khlan wow e yada.
Ka seiñ da pynkynmoo ko leh yei pyrchang ka sorkar wow pynkrehkaam ya ka luti rel na Tetelia (Assam) cha Byrnihat iwa da sepai hadien i pyrchah joor ya ini i kaam ha u snem 2016.
Ka seiñ da pyntip ko leh wa daw lai yachem wa u CEM ka JHADC hadien ka Behdieñkhlam yow kyntu wym toh u e NOC ya ka North Eastern Frontier Railway wei wow man ko leh kam ka stieh yow yada yaka jaitbru kamwa da pynkupbor ha ka.
Ka seiñ da kyntu ko leh ya ki dorbar chnong, ki paidbah wei khamtam ya kiwa mihkhmat nadooh ki MLA, u MP wow ya krehlang hajrong kani ka phang wei neiliang ka seiñ daw booddien ko heiyatoh wa ini wei daw chim leh ki laad ki luti wow pynche paidbah hajrong i maa wow wan lada wanpoi ka luti rel.
Ka seiñ da kyntu ko leh ya ka sorkar wym toh u leh jhan ya kani ka luti rel wei wow wanrah chwa ya ka roi ka paar cha u paidbah nadooh ki sarok, ki thaw puræ puthi wa kiwi de heithaw wow taræ kulmar cha kiwi ya kyrooh pathan i diñ.
