Khliehriat: Ka Seiñ Southern Border Youth Welfare Association (SBYWA), Elaka Rymbai & Elaka Lakadong, EJHD da yieñ ko ha ka yurim wa skem wow pyrchah joor ya i tei ya kiwon kiwon ki karkhana Coke Plant næ kiwon kiwon kiwa thmu wow chna ki kynja karkhana (Factory) hapoh yong ka thaaiñ neibhah daw ktah ko pyn ya ka thaaiñ ha ka liang i chait i khiah, ya ka rymaw wa kiwi kiwi.
Ka seiñ da ong ko wa daw pyrchah joor ko khamtam ya kitu kiwa thmu wow chna karkhana thang mooyong (Coke Plant) hapoh ka thaaiñ kawa haap hajan ki soo tylli ki chnong kitæ ha ka chnong Diengsahtlang, Ladwapung, Umsatai wa Pynurkba.
Kamtæ ka seiñ da kyntu joor ko ya ki paidbah na ki chnong wow pyrchah joor ya kini ki karkhana thang mooyong neibhah lada wan kini ki karkhana, ka thaaiñ hi daw chah ktah ko liang wanang khamtam ki khynnah kiwa man ka mynried ka ri.
Chooh chooh ka seiñ da ong ko wa daw takit wei daw thooh tre ko wow chem yeiwa sakhiat hajrong ini i thmu wow chna karkhana thang mooyong hapoh kini ki soo chnong neibhah katkam ka yutip wa yoh ko wot ya ka yalang paidbah (Public Hearing) leh ympu em pynman heiyatoh wa ini.
Da kyrpaad ko leh ya ka Meghalaya State Pollution Control Board (MSPCB) wa ka chnat khloo ka JHADC wow dam u e Clearance Certificate ya kiwon kiwon ki karkhana thang mooyong hapoh ka thaaiñ, da ong u S Shadap.
Ka seiñ daw khut ko leh ya ka yalang wa jhan wow pyrkhat hajrong ini i kaam waroh iwa ktah ya ki paidbah wa chong chnong ki soo chnong.
Kani toh katkam ka wyrta wa da phah da u S. Shadap, President wa u N.L Talang, General Secretary ka SBYWA, EJHD.
Discussion about this post