Ka seiñ Nongkhlieh Area Socio & Cultural Development hapoh i yahkhmat u Chairman u Embok Pajuh wa u Secretary u Embhah Sukhlain ynne ka sngi da lai ki wow ujor pyrchah hakhmat u CEM ka Jaiñtia Hills Autonomous District Council (JHADC) wa ha u Chief Forest Officer ka Jaiñtia Hills Autonomous District Council (JHADC), hajrong i e NOC ya ki karkhana Coke hapoh ka Elaka Nongkhlieh khlem da tiplang ki para jan chnong.
Katkam katai ka ujor da pyntip wa neiliang yong ka seiñ da pynsñiaw ko wow yieñ pyrchah joor hajrong itai i kaam, da ong leh wa ym pdiang da kammon kammon leh yei e NOC deiwa yoh yei mynjur u Dolloi ka Elaka Nongkhlieh wa da uwon uwon u waheh chnong khlem da ya mynjur lang ki paidbah yong katai ka thaaiñ, neibhah i em yong kitai ki karkhnana ym ktah ko du ya kawi ka chnong tangwa ya kiwi leh ki chnong marjan.
Kamtæ neiliang yong katai ka seiñ da pynche ko wa wot ki karkhana Coke kiwa em hapoh ka Elaka Sutnga kiwa em marjan pood wa ka Elaka Nongkhlieh leh da em chiboon ki chnong kiwa chah ktah neidaw wa em kitai ki karkhana wei sa katwon tam u chah ktah lada ki karkhana em ki hapoh ka Elaka.
Da pynrap leh wa deiwa em kitai ki karkhana da ktah sakhiat ko yei chait i khiah yong kiwa chnong chong wa wot i thung i tep leh da chah ktah lang.
Da pyntip chooh chooh wa katkam wa man katni, i sma wa i tung wa mih na kitai ki karkhana Coke dawan poi chadooh chapoh chnong wei ki chnong kiwa chah ktah kynthup ki ya ka chnong Tongseng, Chnongrim, Khaidong, Chnong Thymme, Chnong Lumbangla wa kiwi de ki chnong wa em marjan.
