Ynne ka sngi u CEM ka JHADC, u Thombor Shiwat da wanrah u ya i thmu wow pynkylla ya ka aiñ Waheh Chnong kawa tip kam ka Jaiñtia Hills Autonomous District (Establishment of Elaka and Village and Election, Appointment, Powers, Function and Jurisdiction of Dolloi/Sirdar and Waheh Shnong) (Amendment) Bill 2026.
Hawa klam hajrong kani ka mat, uwa yahkhmat ka Liang Pyrchah ka Council, u Andrew Shullai da pyrchah u yei thmu wow pynkylla ya ka deiwa ong wa em i yatyngkhooh hapyrdi i thmu wow pynkylla ya ka aiñ.
Da ong u wa ki Dorbar Elaka ymtip lada em poisa ki neibhah wa katkam i thmu pynkylla ya ka Section 4 yong ka aiñ da ong wa ya ka Election Dolloi hap bahkhlieh mar chiteiñ i lut hapyrdi ka JHADC wa ki Dorbar Elaka, katwa kamtæ man ko kawa bakla.
Chooh chooh da ong u wa ka Council wa toh u pynlut ya ka khnang wow em itæ i sñiawtre ya ki Elaka neibhah ka Council wow pait yei bha i miat yong ki.
U Andrew da ong u wa i pynkylla ya ka Section 13 ka aiñ wow pyndam yei por wa da booh wa 2 bnai hawa thung ya ki Dolloi/Sirdar neibhah ini e bor i ya ka Council wow ksoh yei bor Dolloi ka Elaka da 5-6 snem.
Chooh chooh da ong u wa i thung bru ka Council namo i thung da ki sahep yong ka heithaw ki Dolloi daw ktah joor bha i neibhah wa ki da man chwa ki sahep wa boonkaam kammon u ye ki u kreh ar thaw.
Heiyatoh wa i thmu wow pynkylla ya ka Section 23 iwa mut wow ye u pyndam ya ki Election wei wow leh kamwa da pynjooh nachwa, u Andrew da ong u wa ini man iwa bakla neibhah ye u em wa ki Dorbar Chnong u kam ki dei rah kti namo dei kbai iwa da pynjooh nadooh nachwa wei ini ye i wow wanrah yei awri awra. Da kynmoo u heipor wa thoh ya kani ka aiñ da rai wow pynman da ki Election khnang wow neh i suk wa i khooid hei jied waheh chnong.
Kamtæ u Andrew da ong u wa i pynkylla ya kani ka aiñ daw wanrah i yei kulmar ha kiwa boon ki bynta.
Discussion about this post