Jowai: U MDC ka Jowai Central u Andrew Shullai ynne ka sngi da pynsñiaw u yei pyrchah ya ka hukum yong ka sorkar jylla lyngba ka chnat Directorate of Commerce and Industries wada pynmih ha ka 29 Naisan 2019 wei da soi da u Director yong ka hajrong ki industrial Estate wa em hapoh jylla.
Kani ka hukum da ong ko wa waroh ki chiphaw tylli ki thaw karkhana namo ki Industrial Estate, ki Industrial Park wa em hapoh jylla kawa kynthup leh ya ka Khliehtyrchi Industrial Estate, West Jaiñtia Hills toh da mantre ya ki da ka chnat Commerce and Industries katwa kamtæ ym haap de ki hapoh i pait (Jurisdiction) yong ki Autonomous District Council namo kiwon kiwon ki Dorbar Chnong (Traditional Body).
Neiliang u Andrew hawa yaklam wa kiwa pathai khubor ynne ka sngi da ong u wa ini i leh ka sorkar da lai lait i ya ka District Council kawa da tipmit da ka riti synchaar ka ri wei ini i leh yoosar em iwon iwon cha lyndet.
Da ong u wa hapoh kini ki thaw ye u leh boonjait ki kaam wei emkaam wow yohbor na ka Council wa ki Dorbar Chnong tangwa kani ka hukum da yooh ko yei bor ki Council wa ka Dorbar Chnong katwa kamtæ da pyrchah joor u yeini i lehbor kani ka sorkar jylla.
Chooh chooh da kylli u iyi i thmu yong ka sorkar jylla neibhah nadooh nachwa lada emkaam wow leh iwon iwon hapoh kini ki thaw emkaam wow yohbor na ka Council wa na ka Chnong wei kani ka hukum da man ko mar dei kangtleiñ.
U Andrew da ong u leh wa daw yachem u wa u CEM ka JHADC hajrong kani ka bynta wow yaklam wa ka sorkar jylla wow pyndam ya kani ka hukum khnang wa i bor ka Council wa ka Dorbar Chnong u neh i kamjooh.
Discussion about this post