Shillong: U MDC ka Nongthymmai Constituency uwa man leh kam u Executive Member ha KHADC, u Latiplang Kharkongor da ong u wa ka Meghalaya man ko ka jylla kawa dang khian paaid wei ymye u pyndap hadooh 77 hajar ngut kiwa thap Vote thymme du ha kini ki khajiak bnai chwa ka Election MP kamwa da booh thong da ka chnat Election ka jylla.
“Ini i thmu yong u Chief Electoral Officer (CEO) ka Meghalaya wow pynpsiah pyrtuid wa thymme wa da poi hadooh 77 hajar ngut ha chwa ka MP Election ha u snem thymme daw wailaad ko ya kiwi ki bru kiwa na baar,” da ong u Kharkongor.
Uni u MDC da ong u wa ym sñiaw yahaap u wa i thmu ka chnat Election wow e laad ya ki bru wa na baar wow yoh ki u psiah pyrtuid kam kiwa thap Vote.
Kam wow pynkynmoo wa ini wa da dep u Chief Electoral Officer (CEO) ka jylla u Frederick R. Kharkongor, da pyntip u wa ka thong toh hadooh 19 lak ngut kiwa thap Vote ha u snem 2019 neibynta ka MP Election wei da em kamwa 77 hajar ngut ki khynroo khyllood kiwa da dap 18 snem i rta kiwa dang sah wow pynpsiah pyrtuid.
U MDC uwa jooh man leh kam uwa yahkhmat ki seiñbhalang ha ki por wa nachwa da ong u wa ka chnat Election toh u pait bha ko ya i em ki bru na baar jylla kiwa yoh u ksoh ya ar tylli ki EPIC wei emkaam wow ya krehlang wa ki Dorbar Chnong wa ki bru kiwa thmu wow pynpsiah pyrtuid wow wanrah ya ki kot ki sla wa biang wow pynsakhiat wa ki man ki kiwa chong chnong wa pura ka jylla.
“Daw phah O dei thoh cha u CEO ka jylla wa emkaam wow pynsakhiat chwa na ki dorbar chnong lada kini ki bru wa thmu wow pynpsiah pyrtuid man næ ym man ki kiwa chong chnong wa pura ka jylla,” da ong u Latiplang.
Discussion about this post