Ka Super Division ka West Jaiñtia District Sports Association (WJDSA) kawa tip leh kam ka “U Kiang Nangbah Memorial Trophy” da poi ko cha wakut ynne da ka yakhun Final hapyrdi ka Ladthadlaboh SC waka 7 Wasa United FC kiwa man leh ki jooh ki liang wa yachem Final ynnin u snem.
Ka kylla step da lai ko khlem em wa yoh ko u thap kool tangwa haka kylla miet syndet syndet ka 7 Wasa da thap ko ar kool kawi hadien kawi deiwa sdang chwa u Civility Khongmalai haka minit wa 58 wei da pynbood da u Pynshai Lathong haka minit wa 60.
Ka yalehke da im biang ko hadien wa ye ka Ladthadlaboh u pynuiñ chi kool haka minit wa 86 lyngba u Sanki Langstang heiwa ka Ladthadlaboh da sdang ko wow ban yaka 7 Wasa wei da yoh ko kattu katni ki laad yow su sa chi kool tangwa ym ye ki wow pynkhih yaka jaar wei da kut ka yalehke da 2-1.
Kamtæ ka 7 Wasa da man biang ko kam ka Champion ka Super Division ha uni u snem iwa man leh i sien wa 6 wei da rem Final ko dang chisien donhi itæ ha u snem 2019 ha ka Mynthong.
Kam ka Champion ha uni u snem, ka 7 Wasa da yoh ko leh yaka song poisa kawa Rs. 50,000 katwa ka Ladthadlaboh kam kawa rem da yoh ko Rs. 30,000.
Yei naam Man of the Match da yoh u Dashngain Sukhlain uwa na ka 7 Wasa, yei naam Best Goalkeeper da yoh u Pynshngainlang Tyngkra naka 7 Wasa, yei naam Top Scorer da yoh u Banteilang Shylla uwa da thap 7 kool ya ka Ladthadlaboh katwa yei naam Player of the Tournament da yoh u Risanlang I Dkhar uwa yalehke ka 7 Wasa.
Ya kani ka Final da wan wow sakhi da u Wailadmiki Shylla, MLA ka Jowai kam u kongsan deiwa emlang u Nominated MDC, u Octomewot Lamin, u DSO ka District, u Khroobok Passah ki dkhot ka WJDSA deilang wa kiwi kiwa chah khut sñiawbha.
Discussion about this post