Ka 14th U Kiang Nangbah Memorial Trophy Super Division Football Tournament 2022 wa pynman da ka West Jaiñtia District Sports Association, Jowai da poi ko cha wakut ynne ka sngi da ka yakhun Final wa da pynman hapyrdi ka Ladthadlaboh SC pyrchah ya ka 7 Wasa United.
Ka 7 Wasa sa chisien da rah biang ko yei naam Champion deiwa jop da 2-0 ya ka Ladthadlaboh da ki ar kool wa thap da u Buromlangki Salahe, kawi ha ka kylla step ha ka minit wa 32 wa kawi ha ka kylla miet chwa wow kut ka yalehke ha ka minit wa 90 uwa da yoh leh yei naam Man of the Match.
Ya kani ka yakhun Final da wan wow sakhi da u Sniawbhalang Dhar kam u kongsan uwa man leh kam u Montri ka chnat Urban Affairs deiwa emlang leh u Dolloi ka Elaka Jowai, u Puramon Kynjing, u DSO ka West Jaiñtia u K. Passah, u President ka East Jaiñtia Football Association, u James Sutnga, u Secretary ka Saipung Block Sport Association u Rimi Shadap wa kiwi kiwi de.
Yei naam Top Scorer da yoh u Pynishai Lathong na ka Nangbah Mulang uwa da thap 9 tylli ki kool.
Yei naam Best Goal Keeper da yoh u Sbing Chyrmang na ka Ladthadlaboh.
Yei naam Player of the Tournament da yoh u Sanjini Dkhar na ka 7 Wasa.
Ka 7 Wasa da yoh ko leh ya ka song-poisa kawa T. 60,000 katwa ka Ladthadlaboh da yoh ko T. 35,000.
