Shillong: Ka Bethany Society, Shillong da jop ko ya ka 3rd North East Blind Football Tournament, wa pynman da ka Indian Blind Football Federation (IBFF) deilang waka Bethany Society, da 1-0 lyngba ka yachut Tie-breaker ynnin ka sngi ha Shillong Public School.
Ka Bethany Society da yachem ko waka North East Shower Blind Football Club (NESBFC) ha ka Final wei hadooh wa kut ka yalehke ym em wa yoh u thap kool katwa ha ka yachut Tie-breaker u Gabriel Nongrum samen da ye u wow thap kool.
Ya ki yakhun Semi Final da pyndep ynnin i step heiwa ka Bethany Society da pynrem ko ya ka FABB Kolkata da 4-0.
Ka NESBFC kawa na Arunachal Pradesh da jop ko da 1-0 ya ka Moran Blind School, Assam ha ka Semi Final wa bood.
Kiwa jop ya ka Final da yoh ki leh ya ka songpoisa wa T. 25,000 katwa kiwa rem da yoh ki T. 15,000.
U Gabriel Nongrum uwa da thap 15 tylli ki kool da yoh u ya ka Golden Boot. U Captain ka NESBFC u Klingson Marak da yoh u yei naam Player of the Tournament katwa yei naam Most Promising Player Award da yoh u Manzur Hussain naka Handicapped Association of Manipur, ka Manipur da yoh ko leh yei naam Best Goalkeeper kawa da e cha u Sujith PS uwa da yang kool ya ki le tylli ki Team.
U Sujith, Nongrum wa u Marak toh man ki kam ki dkhot ka India International Players.
Ya kani ka sngi da wan sakhi da ka East Khasi Hills Deputy Commissioner ka Matsiewdor War Nongbri, u Superintendent of Police CID u R. Muthu, Meghalaya Football Association (MFA) Treasurer u Wanshanbor Kharkrang, David Absalom u dkhot ka International Blind Sports Association wa u Jani Viswanath naka Healing Lives.
Discussion about this post