Rah ka dhab Cricket na Jaiñtia ya ka 1st Mawlynnai Marbaniang T-20

Jowai : Ka dhab yalehke Cricket na ri-loom Jaiñtia ka All Jaiñtia Cricket Association da rah ko yei naam wa jop ha ka 1^st Mawlynnai Marbaniang District Indigenous T-20 U-19 Tournament wa pynman ha Shillong.

Ya kani ka lympung da sdang nadooh ka 3 tarik uni u bnai wei da pynman da ka Meghalaya Cricket Association (MCA), da pynkut ya ka ynne ka sngi ha madan Polo heiwa ka All Jaiñtia Cricket Association da yachem final ko wa ka Shillong Cricket Association.

Ka All Jaiñtia Cricket Association da bat nyngkong ko wei da yoh ko 105 run deiwa dooh 9 tylli ki wicket.

Ka Shillong Cricket Association won hei kdong ya ka 105 run da yoh ko du 92 run heiwa da haap lut ki wicket yong ki.

Ha kani ka sngi yei naam Man of the Match da yoh u Da-u-ru Lato uwa yoh 44 run, yei naam Best Bowler da yoh u Iookima Paswet uwa yoh waroh 9 wicket nadooh wa sdang, wei ha ka Final da yoh u 3 Wicket na ki 4 tylli ki over.

U Iookima leh da yoh u ya ka song poisa wa T. 12,000, ka poisa wa ye u sai T. 1000 man u bnai ka wow man kam ka Scholarship.

Da wan pynhiar pyrda ya kani ka Tournament da u General Secretary ka MCA u Naba Bhattacharjee hei emlang kiwa ha yung ha sem u Mawlynnai Marbaniang.

Ha kani ka tournament da em 6 tylli ki dhab wa wan chimbynta.

Ya ka All Jaiñtia Cricket Association da seiñ ya ka nadooh u snem 2004 wei man ko ka sien wa nyngkong wa da yoh ko u rah yei naam Champion wei da Coach ya ka da u Deibormi Rangad.