Jowai : Ka Dulong SC ynne ka 20 tarik da pynrem ko ya ka Khimusniang SC ha ka yakhun final wa da pynman ha Kiang Nangbah Stadium, Ladthadlaboh.
Ya kani ka tournament da sdang nadooh ka 27 tarik u January wei da wan chimbynta 15 tylli dhab yaleh bol, wei da pynman ya ka da ka West Jaintia District Sports Association.
Kyruiñ cha ka yalehke final ha ka kylla step man ko kawa ya thaaiñ bha heiwa waroh ar da yoh ki kattu katni ki lad wow thap ya ka kool wa nyngkong tangwa hadooh wa kut ym em wa yoh u thap kool.
Ha ka kylla miet ha ki 10 minit chwa u kut ka yalehke ka Dulong da yoh ko u thap 5 tylli ki kool. Ya ka kool wa nyngkong da thap da u Diangheimon Kyndiah ha ka minit wa 43 min, kawa ar da thap da u Dasien Phawa ha ka minit wa 46, kawa le da thap da u Tremiki Lamurong ha ka minit wa 50, katwa ya ka kool wa 4 wa ka wa 5 da thap da u Oriendo Lakiang ha ka minit wa 55 wa 60.
Ya ka yelhke da pynman du chiteiñ ka madan wei da yaleh mar 30 minit chi kylla.
Ha kani ka sngi leh da pynbna ya ki pyrtuid yong ki 39 ngut ki khynnah na ki Club wa wan chimbynta ha kani ka tournament yow yoh ki u em bynta ha ka Coaching Camp kawa daw pynman da ka WJDSA.
Ha chwa u saam ya ki Trophy cha ki wa jop da e leh ki khusnaam ‘Man of the Match’ cha u Diangheimon Kyndiah yong ka Dulong, ‘Best Goalkeeper’ cha u Heimonmitre Shylla yong ka Luti Tuber Ialong, ‘Top Scorer’ cha u Ebenezer Pohshna yong ka Chutwakhu wa u ‘Player of the Tournament’ cha u Tremiki Lamurong yong ka Dulong.
Discussion about this post