Jowai : Ynnin ka 6 tarik ha Madan Biar, Mission Compound ki artylli ki dhab ka Eco-Friends wa ka Rising Stars da yachem ki ha ka final yong kani ka lympung yalehke Cricket kawa sdang nadooh ka 26 tarik u Duyatra (January) heiwa dawan chimbynta hadooh 17 tylli ki dhab. Ya kani ka lympung da yaleh mar 9 ngut chiliang.
Ha kani ka final da yaleh mar 10 Over wei da bat chwa ka Rising Star. Ha ka ball wa nyngkong dooh wa ball ka Rising Stars da hap u wicket wa nyngkong ka Eco-Friends. Tangwa da pynskem ya ka innings da u Deibormi Rangad uwa da kamai 63 run dei bor yong oo samen. Kani ka 63 run kynthup ko ya 4 tylli ki 6 wa 3 tylli ki 4 run.
Hawa kut ka innings ka Eco Friends da kamai ko 118 run deiwa dooh ya 3 tylli ki wicket.
Ka Rising Stars da kdong ko ya kani ka thong wa 118 wei da ye ko u pyntam ya ka ha ka over wa 8.2 deiwa haap 3 tylli ki wicket. Ya ka innings ka Rising Stars da kamai boon u Teilang War heiwa da yoh u 71 runs wa kynthup leh ya 7 tylli ki 6 wa ka wi ka 4 run.
Ha kani ka sngi u Teilang leh da yoh rah u yei naam ‘Man of the Tournament’ deiwa kamai u 120 run wei yoh u 10 tylli ki wicket ha kani ka tournament.
Ya ka naam ‘Man of the match’ da yoh u Deibormi Rangad yong ka Rising Star.
Ki Rising Stars da rah ko leh ya ka song poisa T. 20,000 katwa kaEco-Friends da yoh ko T. 10,000.
Ya kani ka tournament da pynman da ka Lion Mission Compound Dorbar Chnong, Jowai Sports and Youth Affairs Committee.
Discussion about this post