Ka Sonapyrdi Tourism & Economic Development Society (STEDS) da yoh ko wow pynkut yaka 4th Lukha Festival 2024 kawa da pynman haka 2 wa 3 tarik uni u bnai kawa da wan wai da u Charles Marngar uwa man kam u MLA wa u MDC ka Mawhati Constituency kam u kongsan wa u Lasky Rymbai Dy. CEM JHADC kam u symbood kongsan.
U kongsan hawa e yei klam haka yalang wai pyrda da yaroh u yei miat kani ka thaaiñ Narpuh wei da kyntu u wow em i ya krehlang khnang wow ye u pynku ya ki kaam uiñke suwari.
U symbood kongsan hawa e yei klam da ong u wa ka chnong Sonapyrdi man ko kawa embhah wow yoh ya kani ka thaw wa miat wei da kyntu u ya kiwa kitkaam ka Society wow man kiwa chimkhia wym toh u e laad wow pyntnngit ya kani ka wah wa pawnaam.
Ha kini ki sngi da pynman leh yei lai kjat cha u Loom Bah Bo Bah Kong wa da pynman da ka STEDS hapoh i yahkhmat kiwa kreh ka chnat Wildlife.
Ha kani ka sngi nyngkong da pynman leh yaka yakob miat kynthai, kawa tip kam ka Miss Lukha heiwa yei naam Miss Lukha 2024 da yoh rah da ka Hakani Phawa, yei naam 1st Runner Up da yoh ka Ephida Ymbon katwa yei 2nd Runner Up da yoh da ka Dorachiva Daw.
Yei naam Miss Perfect da yoh rah da ka Emika Dkhar, yei naam Miss Beautiful Skin da yoh da ka Sahema S Sangma, yei naam Miss Congeniality da yoh da ka Marriane Nongbri, yei naam Best Cat Walk da yoh rah da ka Dorachiva Daw, yei naam Best Personality da yoh da ka Niha Hajong katwa yei naam Beautiful Hair da yoh da ka Ephida Ymbon.
Ha ka sngi pynhaap pyrda da wan wow man kam u kongsan da u Emlangki Lamare, MDC Narpuh Constituency wa u D. Malang kam u symbood kongsan.
Neiliang u kongsan da kular u wow yarap yaka Society yow pynku ya kani ka thaw yow pynmiat ka yow khriñ ya kiwa uiñke suwari na kylleiñ kylleiñ.
Ha ki yakob wa boon jait wa da pynman, kam ka Painting Competition yong ki khynnah khian, da yoh nyngkong ka Sweety Aroma Syiemlieh na Chiehruphi Secondary School, hei wa ar da yoh da ka Abeni Bamon na Gilead Learning Centre Shillong katwa hei wa le da yoh da ka Gavriella G Suchen na Holy Family English School Khliehriat.
Da pynchongchit ya kani ka sngi da kiwa tem wa rwai wa pawnaam wa kyntup ya ki Summersalt wei da em leh ki DJ.
Ka Sonapyrdi Tourism & Economic Development Society (STEDS) da e khublei ko ya waroh ki paidbah kiwa da yawan wow embynta ha kani ka tamasa.
Discussion about this post