Ka yakob Miss Meghalaya 2022 kawa da pynman ynnin ka sngi ha U Soso Tham Auditorium, ha kani ka kynti hei sien wa nyngkong da pynman lang waka Miss Teen Meghalaya 2022.
Yei naam Miss Meghalaya ha uni u snem da yoh rah da ka Irene Dkhar, yei naam 1st Runner Up da yoh ka Jessica Kharlukhi katwa yei naam 2nd Runner Up da yoh ka Ridamaya Passah.
Ha ka Miss Teen Meghalaya da jop da ka Daniella Shirley Majaw, yei naam 1st Runner Up da yoh ka Wanlum Rynjah katwa yei naam 2nd Runner Up da yoh ka Frensila Marak.
Ka yakob Miss Meghalaya ha uni u snem da man ko leh kam ka luti wow lai chim bynta ha ka yakob Miss Northeast 2022 kawa daw pynman ha Kohima Nagaland ha uni u Naichiphaw.
Kamtæ kawa jop yei naam Miss Meghalaya wa kawa yoh 1st Runner Up daw lai mihkhmat ki ya ka Meghalaya ha ka Miss Northeast 2022.
Kawa jop ya ka Miss Teen Meghalaya won daw mihkhmat ko ya ka Meghalaya ha ka Miss Teen Diva kawa da pynman ha Jaipur ha uni hi u snem.
Kawa jop yei naam Meghalaya da rah ko leh ya ka song poisa kawa T. 1 lak, kawa yoh 1st Runner Up da yoh ko T. 50,000 katwa kawa yoh 2nd Runner Up da yoh ko T. 25,000.
Kawa jop yei naam Miss Teen Meghalaya da yoh ko leh ya ka song poisa kawa T. 25,000, kawa yoh 1st Runner Up da yoh ko T. 15,000 katwa kawa yoh 2nd Runner Up da yoh ko T. 10,000.
