Jowai: Ka yakop pynyoo sap yong ki khon ka ri-loom Jaiñtia kawa tip kam ka Jaiñtia Got Talent kawa pynman da ka seiñ Chirup U Krehlang I Society da poi ko chawa kut ynne ka janmiet ha District Library Auditorium, Mynthong, Jowai heiwa da wan chimbynta ki 24 ngut kiwa poi cha kani ka Final heiwa wa ar ngut da psiah ki lyngba ka Wildcard Entry. Na ki ar ngut kini ki Wild Card Entry kawi da rah ko yei naam wa ar.
Ynne ka sngi kiwa poi cha ka Final waroh 26 ngut da pynyoo ki ya jar jiar i sap yong ki wa pynman ya ki u yakhun ha kani ka Final heiwa da pynsñiaw ki yei chyoh wa thiang yong ki da ki rwai kamjooh i sap hei chaad kiwa da pynchohbiej ya ki paidbah, da em leh uwi uwa leh jadu kawa ye u ong wa niaar u chem hapoh Jaiñtia Hills hi waroh kawi.
Ha kani ka Final da wan bichaar da ki Judge wa pawnaam kiwa kynthup ya u Monlang Niang wa ka Lussiana kam kiwa chaad wa pawnaam wa u Gregory Fancon wa u Rocky Shylla kiwa man kiwa rwai wada naam bha.
Ya kani ka yakop da pynman da i bichaar lyngba ki Public Vote wa i bichaar da ki Judge.
Hawa kut manda pynbna ya i naam kiwa jop yei naam wa le namo 2nd Runners-Up da rah da u Chemi Langstang uwa man kam uwi na kiwa chaad ha kani ka yakop.
Yei naam wa ar namo i naam 1st Runners Up da rah da ka Darishisha Biam kawi na ki khynnah kawa rwai wei da psiah ko cha ka Final lyngba ka Wild Card Entry.
Yei naam jop ha kani ka yakop da rah da ka khynnah wa dang 11 snem i rta kawi na kiwa rwai na Chilliangraij, ka Dawbhaki Pde.
Discussion about this post