Jowai: Kam chibynta wow pynchlur ya ki khynroo khyllood wow chimbynta ki ha ki Election kamjooh wow em pyrtuid ki ha ka Electoral Roll, ka Election Commission of India (ECI) da pynman ko da ka yakop wa tip kam ka All India ECI Quiz heiwa ha West Jaiñtia Hills ha ka kyrdan District da pynman ya ka da ka yungkrehkaam u Deputy Commissioner (Election), WJH.
Ya kani ka Quiz wa pynman ynne ka sngi ha District Library Auditorium, Mynthong, Jowai, da wan chimbynta 15 tylli ki skur wei da pyllai ya ka da u B.J. Kharshandi, EAC.
Na ki 15 tylli ki skur da jied 8 tylli lyngba ka Written Test heiwa kiwa chimbynta haap jubab ki ya ki phang kylli wei kiwa duna dooh wa yoh points da dooh ki u chimbynta.
Ka Quiz da em ko 5 kylla heiwa ki phang man ki chaphang ka riti synchaar ka ri, chaphang ka Election Commission, wa ki kaam Election wa dadep hapoh ka jylla.
Hadien wa kut kini ki 5 kylla, ki le tylli ki skur ka Jaiñtia Secondary School, ka North Liberty HS School wa ka Government Boys’ HS School waroh da yoh ki i jooh ki point hei kyrdan wa ar. Kamtæ kini ki le tylli ki skur da yaknieh ki yei naam wa ar wa le heiwa ka Government Boys’ HS School da yoh wa ar ko katwa ka North Liberty HS School won da yoh wa le ko. Yei naam wa jop da lai ko cha ka Marian Hill HS School.
Kiwa yoh nyngkong da yoh ki leh ya ka song poisa wa T. 3000, wa ar T. 2000 katwa kiwa yoh wa leh won da yoh ki T. 1000 chirup wa ki Certificate wa ki Trohphy.
Kini ki le tylli ki skur daw yohlaad ki leh u chimbynta won sa ha ka kyrdan State Level All India ECI Quiz wa daw pynman ha Shillong wei ye ki leh u poi cha ka National Level lada pteiñ i jop ki.
Ya Marian Hill HS School da mihkhmat u Ronaldo Rymbai wa ka Naphibanroi Suchiang, ya ka Government Boys’ HS School won da mihkhmat ka Arcydaroi Pohtam wa u Confirm Susngi katwa ya ka North Liberty HS School won da mih khmat u Bet-won-sa-oo Passah wa u Brian Benjamin Uriah Lywait.
Discussion about this post