Jowai: Ka yakhun Final ka Super Division ka WJDSA kawa tip leh kam ka 12th U Kiang Nangbah Memorial Trophy, ynne ka sngi da pynman hapyrdi ka Mynthong SC pyrchah yaka 7 Wasa United FC.
Ka Mynthong da jop ko da 6-5 lyngba ka yachut Tie-breaker hadien ka yalehke da kut ko da 2-2.
Ha ka kylla step neiliang ka 7 Wasa da yoh ko wow pynkhih nyngkong ya ka jaar lyngba u Pynishai Lathong ha ka minit kawa 18 yong ka yakhun, neiliang ka Mynthong SC won da yoh ko wow pynuiñ ya kani ka chi kool yong ka 7 Wasa lyngba u Deepak Chettri ha ka minit kawa 45+1 wei ka yakhun yong ka kylla step da kut ko mar chi kool.
Ha ka kylla miet yong ka yalehke ka yakhun da man ko kawa yoosuk chooh chooh heiwa neiliang ka Mynthong SC da yoh ko wow pyntam sa chi koool lyngba u Jerry Shylla ha kamiit kawa 57, kamtæ neiliang kiwa yalehke kamjooh leh kiwa kyrchaan yong ka Myntnong SC da tikna wow yoh yei jop tangwa neiliang ka 7 Wasa ha ka minit kawa khaddooh katæ haka 90+5 lyngba i smat u Namphang Sumer da yoh u wow pynya drawn yaka yakhun da 2-2, heiwa haka Extra Time won da kut ko khlem em wa yoh u thap kool.
Kamtæ ka yalehke da poi ko cha ka yachut Tie-breaker heiwa i lehbha uwa yang kool ka Mynthong da yoh wow khang laad arsien katwa uwa yang kool ka 7 Wasa da ye u wow khaglaad chsien, kamtæ ka Mynthong SC da man ko kawa jop yaka 12th U Kiang Nangbah, Memorial Trophy .
Da ini i jop, ka Mynthong SC da yoh ko wow chimbynta ha ka lympung yong ka Meghalaya State League kawa daw sdang ha uni u bnai, katwa ka 7 Wasa United FC daw hap ko wow yaleh chwa yaka Qualifying Round neibynta wow psiah cha ka lympung yong ka MSL.
Ha kani ka sngi yei naam Top Scorer da e cha u Pynishai Lathong uwa thap 15 kool uwa yalehke ka 7 Wasa United FC, Best Goalkeeper da yoh u Daemitre Dann uwa yalehke ka 7 Wasa United FC, Man Of The Match da yoh u Heipormi Talang uwa yalehke ka Mynthong SC katwa yei naam Player of the Tournament da yoh u James Gray Tongper uwa yalehke ka 7 Wasa United FC.
Ya kani ka Final da wan sakhi da u Vincent H. Pala, u MP ka Shillong, hei emlang u MLA ka Jowai u Wailadmiki Shylla kamjooh leh u Deputy Commissioner ka West Jaiñtia Hills District, u Garod LSN Dykes, ki dkhot ka WJDSA wa kiwi.
Discussion about this post