Ka Nangbah Mulang SC da jop ko ya ka Final yong ka 11th Secondary School Football Knock-Out Tournament 2024-25 wa pynman da ka Dorbar Chnong Pdengshakap deiwa jop ko ya ka Pohplet FC da 3-2.
Ya ki kool ka Nangbah Mulang da yoh thap da u Deibormame Tongper ha ka minit wa 3, u Sangti Janai ha ka minit wa 70 wa u Civility Khongmalai ha ka minit wa 73. Katwa ya ki kool won ka Pohplet da yoh u thap da u H. Minghlu Vankal ha ka minit wa 23 wa u Aibiang Nongneng ha ka minit wa 36.
Ha kani ka sngi yakhun Final da wan wow sakhi wei pynhaap pyrda da u Thombor Shiwat, CEM JHADC, deiwa emlang u Medling Swer, CEM JHADC, u Dapmon Tariang, General Secretary ASSA, u Dolloi ka Elaka Satpator wa kiwi tawon ki waheh.
Hachwa u sdang ka Final da em ka yalang wa tbian wa pynlai da u Ailad Surong, Asst. Chairman ka chnong Pdengshakap wei da yoh leh ya i klam na u Secretary ka chnong Pdengshakap, u Shailang Pakyntein, u T. Shiwat kam u kongsan, u M. Swer kam u symbood kongsan wa na u Astarcus Kassar, Secretary SMC.
Yei naam Man of the Match da yoh rah da u Civility Khongmalai na ka Nangbah Mulang SC, yei naam Best Goalkeeper da yoh rah da u Ialam Biam na ka Nangbah Mulang.
Ka Nangbah Mulang da yoh ko u rah ya ka song poisa kawa Rs. 3,50,000 deilang ka Trophy, katwa ka Pohplet da yoh ko u rah Rs. 2,50,000 deilang ka Trophy.
Discussion about this post