Ka Super League ka Amlarem Sub-Divisional Sports Association (ASSA), ynne dapoi ko cha wakut heiwa ka Youth Club Pdengkarong da yoh rah biang ko yei naam jop ha kani ka kynti wei da yoh ko u mihkhmat chaka State League hadien wa pynrem ko yaka Man-I-Bha SC Skhentalang da 2-1 ha madan yalehke ha Ladjaplem.
Ka yalehke ha kani ka sngi da man ko kawa pynchongchit bha ya kiwa paitke lyngba i sap wa pynyoo da kiwa yalehke hapoh madan, tangwa dei lehbha ka Pdengkarong da yoh ko wow thap smat pyn haka minit wa 3 lyngba u Marshial Nongrum wa haka minit wa 30 lyngba u Special Nongrum iwa da pynskem hadooh wa yohrah naam jop ko, neibhah ka Man-I-Bha da yoh ko u pynuiñ du chi kool haka minit wa 38 lyngba u Leo Rasmut.
Ya kani ka yalehke da wan sakhi lang da u MLA ka thaiñ u Lahkmen Rymbui, u District Sports Officer, u K. Passah wa kiwi de.
U Lahkmen Rymbui hawa e yei klam da kyntu u ya waroh ar liang u nangleh bha chooh chooh ki chakhmat khnang yow ku ki neipor cheipor, wei yaroh u leh yaka Amlarem Sub-Division Sports Association kawa da lai luti neibynta u pynku yaki kaam Sports haka thaaiñ.
Ka Pdengkaron kam kawa jop da yoh ko leh yaka song poisa kawa T. 60,000 katwa ka Man-I-Bha da yoh ko T. 40,000.
Yei naam Man of the Match da yoh da u Special Nongrum (Pdengkarong), i naam Top Scorer da yoh u Marshial Nongrum (Pdengkarong) wa u Tiplang Rasamut (Amlarem) kiwa da yoh u thap mar 6 kool katwa yei naam Best Goalkeeper da lai cha u Sambor Tariang uwa lehke ka Man-I-Bha Sports Club.
