Mawryngkneng: Ka Pomlahier SC da rah ko ya ka 9th Mawryngkneng Greater Football League 2017-18 hadien wa pyrnrem ko ya ka Mawthulai SC lyngba ka Tie-Breaker da 4-3 kool.
Kani ka yakhun Final da man ko kawa pynhun ya ki paidbah wa wan paitke neibha pyn-arliang man ki kiwa yatoh bor wei nadooh wa sdang ka kylla step wei hadooh wa kut ka kylla miet ym em wa yoh wow pynkhih ya ka jaar wei waroh arliang leh da yoh kabu ki wow thap kool.
Kamtæ ka yalehke da pteiñ ko cha ka Extra Time heiwa ym em wa yoh u thap kool wei da rai ya kiwa jop da ka yachut Tie-Breaker.
Ha ka yachut Tie-Breaker arngut na kiwa chut ka Mawthulai SC ym em yoh ki u thap kool wa uwi na ka Pomlahier SC kamtæ ka Pomlahier SC da jop ko da 4-3 kool.
Kani toh ka sien wa nyngkong ya ka Pomlahier SC na Mawryngkneng wow jop ko ya kani ka khusnaam wei ha ki snem wa da dep da poi Final ko la arsien wei ka sien wa nyngkong ya ka Mawthulai SC wow psiah cha ka Final kani ka League.
Da ini i jop ka Pomlahier SC da yoh rah ko ya ka song poisa wa T. 42,000 wei ka Mawthulai SC da yoh ko T. 20,000 chirup wa ki Trophy.
Ya ki khusnaam yong samen ha kani ka lympung da yoh u Embhah Mawthoh (Mawthulai SC) kam u Best Goalkeeper, u Kmenlang Dhar kam u Best Midfielder, u Mebanwel Kharsati (Pomlahier SC) kam u Best Defender wei ya khusnam Top Scorer da saam cha ki le ngut u Rishanbor Kharsati (Pomlahier SC), u Angisius Mukhim (Mawmang SC) wa cha u Kynsai na Lapalang SC kiwa yoh u thap mar soo kool samen.
Ha kani ka sngi u Pyniaid Sing Syiem, MDC ka Sohryngkham Constituency da man u kam u kongsan heithaw u Banteidor Lyngdoh, Minister yong ka tnat Sports ka jylla Meghalaya wei da pynbna u ya ka khubor wa phah da u montri wa kular u wow chimkhia wow pynku ya ka kaam yalehke wow yoh myntoi ka chong Mawryngkneng.
Ka Mawryngkneng Greater Football League toh kawa da sdang nadooh u Khongchonglaad (Nov) 2017 wei da pynkut ya ka ha uni u bnai.
Discussion about this post