Ka Rangdajied United FC da rah ko ya ka Meghalaya State League 2023 deiwa jop ya ka Khliehmawlieh Youth Club da 1-0 ha ka yakhun Final kawa da pynman ha SSA Stadium, Shillong ynne.
Ka kool wa pynjop toh kawa thap ha ka minit wa 9 da u Wanlamsuk Nongkhlaw deiwa sakhi da kiwa boon kiwa kyrchaan na waroh ar liang.
Da ya emlang leh u Symbood Montri Rangbah, u Sniawbhalang Dhar, uwa e buit u Montri Rangbah, u Hamletson Dohling, u Additional Chief Secretary, u Dr. P Shakil Ahammed, ka Deputy Commissioner ka East Khasi Hills, ka RM Kurbah, ka Secretary ka Sports and Youth Affairs, ka R. Sohkhlet, u MLA warim wei kamjooh uwa jooh yalehbol ka India, u Eugeneson Lyngdoh, ki dkhot ka Meghalaya Football Association deilang wa kiwa mihkhmat ki District Sports Association.
Kam wow pynkynmoo wa ka Rangdajied da rem ko ha ka Final ha ka MSL 2019 pyrchah ya ka Shillong Lajong.
Ha kani ka sngi da saam leh ya ka Cheque wa mar T. 2 lak cha waroh ki Association wa da tipmit da ka MFA yow pynman ya ki lympung yalehbol ha ki jar jiar ki thaw yong ki kam chibynta wow pynkhlan ya ki kaam yalehbol.
Neiliang u President ka MFA, u Larsing LD Sawyan da e khublei u ya ka sorkar yei kyrchaan yong ka kawa da e poisa wow sdang ya ka MSL nadooh u 2017-18.
Waroh ki Club wa psiah hapoh ka MSL da yoh ki mar T. 1 lak samen, katwa kiwa psiah Final won da yoh ki sa mar T. 1 lak samen. Ka Khliehmawlieh won kam kawa rem Final da yoh ko T. 3 lak katwa ka Rangdajied United kam ka Champion da yoh ko T. 5 lak.
Ha kani ka sngi da saam leh yei khusnaam cha kiwa yalehke heiwa u Donlad Diengdoh naka Mawlai SC da yoh u ya ka Golden Boot kam uwa da yoh u thap 15 kool. Ya ka Golden Glove da yoh da u Banshanlang Sten kam u BestGgoalkeeper wei ya ka Golden Ball da lai cha u Tremiki Lamurong kam u Best Player kiwa waroh ar na ka Rangdajied.
