Ka lympung yaleh Cricket wa da pynman daka KSU kawa da e pyrtuid kam ka T20 Maitshaphrang Khasi League Cricket Tournament 2021-2022 da poi ko cha wakut ynne ka sngi da ka yakhun Final hapyrdi ka Rangkynsai CC waka Lumshyiap CC.
Ka Lumshyiap da jop ko ya ka kylla khlem wei da jied ko wow Bat nyngkong deiwa kamai 87 Run deiwa dooh lut ki Wicket na ki 19.2 Over.
Na kiwa Bat ka Lumshyiap wa kamai boon Run dooh toh u Dapborlang uwa da yoh 20 Run na 21 bol.
Kiwa kawang bol ka Rangkynsai kiwa da yoh boon Wicket dooh toh u Morningstar Khongwir uwa na ki 4 Over da e u 19 Run deiwa chim 3 Wicket wa u Deibormi Rangad uwa da kawang 4 Over deiwa e 10 Run wei da chim u 2 Wicket.
Ka Rangkynsai hawa kdong da poi ko cha ka thong deiwa yoh 88/7 na ki 18.4 Over.
Da yarap wow pynjop ya ki da u Raja Khongwir uwa kamai 26 Run na 30 bol khlem haap.
Kiwa kawang bol ka Lumshyiap wa da lehbha toh u Shembhalang uwa da yoh 2/15 na ki 4 Over wa u Firstborn uwa da yoh 2/16 na ki 4 Over.
Kamtæ ka Rangkynsai da jop ko da 3 Wicket.
Yei naam Man of the Match ha kani ka sngi da lai cha u Raja Khongwir yong ka Rangkynsai.
Yei naam Promising Player U-19 da yoh u Charm Marbaniang, Rangkynsai SC. Yei naam Promising Player U-23 da yoh u Donkupar Nongkynrih, Occult Salesian Youth. Yei naam Man of the Series da yoh da u Klostarding Lyngdoh, Lumshyiap CC.
Ya kani ka Final da wan wow sakhi da u Banteidor Lyngdoh, Sports & Youth Affairs Minister kam u kongsan wa u Lambok Starwell Marngar, President KSU. Da emlang leh ki dkhot ka MCA wa u Sanlang Kharkongor u diah u Rahboklang Kharkongkor (uwa man uwi na kiwa seiñ ya ka Khasi League ha ki phaw snem 1980).
Neiliang ka MCA da pyntip ko wa daw jied ko kattu katni ngut kiwa chimbynta kiwa hapoh 19 snem wow e Scholarship ya ki.
Neiliiang won u Banteidor da pynbna u wa ka chnat Sports daw yarap ko wow e khusnaam ya ka liang wa jop hadooh T. 2 lak ha ka Maitshaphrang Khasi League Cricket Tournament 2022-2023.
