Ka Sonapyrdi Tourism & Economic Development Society (STEDS) da pynkut ko ya ka “3rd Lukha Festival 2023″ kawa ar sngi ha ka 4 tarik uni u bnai kawa da wan wow wai pyrda ha ka 3 tarik da u Dr. P. Nongtdu uwa man u Principal ka Jaiñtia Eastern College, Khliehriat kam u kongsan wa u Minot Lapasam kam u symbood kongsan deilangwa ki spah ngut ki paidbah.
U Dr. P. Nongtdu kam u kongsan hawa e yei klam da ong u wa emkaam sakhiat wow yoo jngai wei wow man kiwa stat wow sumaar wei pynneh pynsah ya iwa em ha ka rymaw. Da pynkynmoo u leh wa 30 snem nachwa na Khliehriat da hiar chadooh Sonapyrdi woww baam-ja Hotel neidaw ka dakha na Wah Lukha.
Kamtæ da ong u wa emkaam wow ya tylli yow ye u pynpoi cha i thong yong ka STEDS wei da khut u leh yei ya krehlang yong ka imlang sahlang yow ye u leh yeini.
Ha ka sngi nyngkong kani ka Lukha Festival da pynman leh ya ka yakob miat kynthai kawa tip kam ka Miss Lukha 2023 wa jop da ka Rimika Dkhar kawa da yoh leh ya ka poisa wa T. 30,000; yei naam 1st Runner Up da yoh rah da ka Jingieit U Ai Timung kawa da yoh leh ya ka song poisa kawa T. 20,000 wei yei naam 2nd Runner Up da yoh da ka Hakani Phawa deilang ka song pisa kawa T. 10,000.
Ya i naam Best Cat Walk da yoh da ka Firstlin Roy Kam, yei naam Beautiful Hair da yoh da ka Rortunate Mika Dkhar katwa yei naam Best Costume da yoh da ka Rimika Dkhar wei yei naam Beautiful Smile won da yoh da ka Hakani Phawa.
Ha ka sngi wa ar kani ka tamasa da pyman yei lai kjat namo ka Trekking hapoh ka Narpuh Wildlife Sanctuary kawa da wan chimbynta da ki NSS Unit ka Jaiñtia Eastern College, ki bru napoh ka Wildlife Department kiwa da yahkhmat ya kani ka lai Trekking.
Da em leh ka yakob kiñ lien, ka yakob yimpa, ka Beach Futsal Competition, Scuba Diving, Painting Competition wa kiwi kiwi de ki yalehke.
Heipor miet da wan wow pynwyrngia da ki dhab tem wa pawnaam wa tip kam ki Snow White kiwa na Shillong.
