Ka yalehke Cricket wa tip kam ka 1st T10 Tennis Ball Knock Out 8-A-Side Cricket Tournament wa pynlai daka Lion Sport & Youth Affairs, Jowai da poi ko chawa kut ynne ka sngi da ka yakhun Final hapyrdi ka Rising Stars pyrchah yaka Nios Sports Club.
Chwa u sdang ka yalehke da em ka yalang tbian wow pyn-ehbok pyn-ehnasib ya kiwa chimbynta wada emlang nadooh u MLA ka thaaiñ u Wailadmiki Shylla, ki MDC ka JHADC u Saron Paswet, u Octomewot Lamin wa kiwi de.
Neiliang u Wailadmiki hei klam yong oo da pynsñiaw u i kmen wow yoo waka yalehke Cricket leh da sdang ku ko haka District najrong ka yalehbol.
Da ong u wa i chimbynta ki sahep sorkar wa ki Doctor ha kani ka lympung u man ko kam ka nongmuna yaki khon khynroo, neibhah wa wot hapyrdi i boonkaam leh da pynlait ki yei por wa kordor wa sñiawthooh ki yei emkaam i chait i khiah.
Da yaroh u leh yaka thong ka Lion Sport & Youth Affairs wa i pynman ya kani ka lympung wym deiwa mut ware yei myntoi tangwa kongsan yei bha i miat ki khon khynroo. Wei wot lym yoh ka madan wa biang leh pyrkhat won ki u pynman heitæ i rukom wa ki khon khynroo u yoh bait ki ka laad yalehke.
Hawa kyruiñ chei yakhun hapyrdi kini ki arliang, ka Rising Stars da yoh ko yaka laad wow Bat nyngkong heiwa da booh ko ya ka thong kawa 174 Run.
Kiwa rap yalehke bha neiliang ka Rising Stars toh u Rijesh Lytan, uwa da kamai 68 Run na ki 25 bol, wa u Deibormi Rngad uwa da kamai 42 Run na ki 15 bol wei da yoh u leh 4 Wicket.
Ha ka kdong ya ka thong, ka Nios Sports Club da kamai ko 57 Run hadien yong ka 3 Over deiwa dooh ko chi Wicket.
Uwa kawang bol ka Rising Stars u Peterson Lamare da yoh u wow pynhaap ya u Roskil Challam uwa da kamai 55 Run na ki 15 bol, heiwa kiwa bood kiwa Bat ka Nios Sports Club ym ye de ki u beh ya kani ka thong deiwa haap smat uwi hadien uwi.
Kamtæ ka Nios Sport Club da poi ko du 98 Run donhi deiwa dooh lut ki Wicket na ki 9 Over iwa da pynjop ya ka Rising Stars da 75 Run.
Yei naam Man of the Series da yoh da u Deibormi Rangad uwa da yoh 247 Run wa 9 Wicket ha kani ka Tournament.
