Ka Super Division ka East Jaiñtia Hills District Football Association (EJHDFA) kawa tip leh kam ka 3rd Kyrmen Shylla Contribution Trophy ynne da poi ko cha wakut da ka yakhun Final hapyrdi ka Rymbai Shkenshynriah SC waka Sutnga SSCC.
Ka yalehke hadooh wa kut ka kylla step ym em wa yoh u thap kool wei haka kylla miet won haka minit wa 73, u Obadaia Bareh da yoh u thap ya ka kool kawa da neh hadooh wa kut yow e yei jop yaka Shkenshynriah yow man kam ka Champion ka Super Division.
Da ini i jop, ka Rymbai Shkenshynriah da yoh ko wow mihkhmat ya ka East Jaiñtia Hills District cha ka Meghalaya State League ha ka samoi wow wan.
Ka Rymbai Shkenshynriah da yoh ko leh yaka song poisa kawa Rs. 1,00,000 katwa ka Sutnga kam kawa rem da yoh ko Rs. 50,000.
Da wan wow saam ya ki khusnaam cha kiwa jop da u Kyrmen Shylla kam u kongsan uwa man leh kam u MLA ka thaaiñ wa u Montri sorkar katwa cha ka liang wa rem da saam da u Hamlet Dohling, President ka MFA.
Yei naam Best Discipline Team da yoh ka Dhana SC, yei naam Best Goalkeeper of the Tournament da yoh u Shain Muksor naka Thangskai Tiger SC, yei naam Player of the Tournament da yoh u Ioanis Suchen na Sutnga SSCC katwa yei naam Player of the Match da yoh u Obadaia Bareh naka Rymbai Shkenshynriah SC.
Da ya emlang leh ha kani ka sngi wa ki dkhot ka MFA wa ki dkhots ka EJHDFA.
Discussion about this post