Ka 7th Money Prize Football Tournament yong ka Chiehruphi Social & Youth Welfare Sports Club dapoi ko cha wakut haka 29 tarik uni u bnai da ka yakhun hapyrdi ka Umtyr-a SC pyrchah yaka Rymbai Shynshynriah SC.
Ha chwa u sdang ya ka yalehke, da yoh yei klam pdiang burom ya kiwa chah khut sñiawbha da u Dr. J. Lapasam, uwa man u Chairman yong ka Club, da yoh leh i klam yahkhmat na u Asst. Waheh Chnong ka Chiehruphi, u Tbn R.S. Dhar wa na ki kattu katni ngut.
Ka kongsan ha kani sngi ka toh Santa Mary Shylla kawa man leh ka kyrtong wow yakhun Election MLA 2023, katwa u Acting Daloi ka Elaka Sutnga, u B. Sutnga da man u kam u symbood kongsan.
Neiliang ka kongsan da e khublei kyrpang ko ya kiwa yahkhmat ka Club wa da ye ki u pynlai bait pynlai ryntih ya kani ka lympung yalehbol nadooh wa sdang, da kyntu ko ya kiwa yahkhmat ka Club won wan ki kiwa yatoh yumut ha kawon kawon ka kaam khnang wa ki kaam yong ka Club u lai bait lai ryntih chaphrang.
Hawa kyruiñ cha ka yalehke, da man ko kawa yoosuk, kawa pynhun ya kiwa wan paitke wei da man ko kawa chongchit heiwa da jop ka Rymbai Skhenshynriah yaka Umtyr-a da 2-1 wei da rah syndon ko yaka song poisa kawa T. 2 lak deilang waka Trophy katwa Umtyr-a kam kawa rem da yoh ko yaka song poisa wa T. 1 lak deilang waka Trophy.
Neiliang ka Club e khublei kyrpang ko ya phi ki paidbah wa da wan pynchongchit ya kani ka Tournament nadooh wa sdang hadooh wa da pynkut wa kamjooh ya waroh ki 32 tylli ki liang wa da wan chimbynta, ya u OC In-charge Lumshnong PS, u Hambertus Nongtdu (Ex-CEM Jhadc), u Seiborlang Chadap, MDC, u Bankupar Sutnga, Acting Dolloi Elaka Sutnga wa kyrpang yaka kongsan yow yoh ko dei chait i khiah hei lai luti ko chaphrang.
