Kam chibynta ka Lyngkien Music Festival wa ar sngi wa da pynman ha Ialong haka 16 wa 17 tarik uni u bnai, da pynman leh ya kawa nyngkong dooh ka yakob miat kynthai wa tip kam ka 1st Miss Myntdu wa da wan chimbynta da ki 13 ngut ha ka 16 tarik heiwa haka 17 tarik da em ka DJ Astridx kawa na Manila, Philippines.
I thong yong kani ka tamasa toh wow pynku ya ki kaam uiñke suwari hapoh ka chnong Ialong wei wow pynneh pynsah yei khooid i suba yong ka wah Myntdu wa ki talawiar ka wah wei yow pynyoo yei maya ya kani ka wah.
Ya ka yakob 1st Miss Myntdu da pynman ha ki le kylla heiwa nynkong da tip kam ka Traditional Fusion Round, kawa ar kam ka Winter Wear Round wei kawa le kam ka Evening Gown (Formal) Round.
Hadien wa kut kini ki le kylla neiliang kiwa bichaar kiwa kynthup ya ka Lunamon Laloo kawa jooh man kam ka Miss Jowai, ka Daribaitka Pde kawa jooh man kam ka Miss Jowai wa u Genesis E Kam da yoo biang ki wow jied na ki 13 ngut yaka Salina Najiar kawa na Loompyri Iongpiah, Jowai kam ka Miss Myntdu wei da yoh ko leh yaka song poisa kawa T. 30,000.
Yei naam 1st Runner Up da yoh ka Fiona Dhar kawa na Ialong deilang waka song poisa kawa T. 20,000 katwa yei naam 2nd Runner Up da yoh ka Aishwariya Malang kawa na Khliehiongriang Jowai deilang waka poisa ka T. 10,000.
Neiliang u kongsan ha kani ka sngi, u Phasmon Dkhar, EM ka JHADC da e mynsien u ya ka Lyngkien Music Festival Society yow nang pynku ko ya ki kaam uiñke suwari kamjooh yow pynim ya ki dustur riti wei kamjooh leh wa emkaam u syndong ya ka wah Myntdu kawa pynbiang um pynbiang baam ya i.
