Ka Jalaphet Lumsashram Socio & Cultural Sports Club ha ka 2 tarik uni u bnai da pynhaap pyrda ko ya ka lympung yalehbol wa tip kam ka 25th Knockout Football Tournament 2024 kawa da pynman ha Madan Kdohmuid heiwa ya kani ka yakhun Final da wan wow sakhi da u Wailadmiki Shylla, MLA ka Jowai kam u kongsan.
Da ya emlang leh u Seibor Shadap, MDC ka Narwan Sutnga Constituency, u Bishar Pala, u Hopingstone Bareh (MDC warim), u Basterwel Bareh, u Lambha Chyrmang, Waheh Chnong Jalaphet Sumer wa kiwi kiwi de kiwa chah khut sñiawbha.
Neiliang u kongsan da ong u wa em sakhiat boon i duna ha kani ka madan yalehbol, kamtæ u pyrchang u yaleh katwa ye yow yarap yaklam wa ka sorkar yow yarap pynyoh Scheme neibynta wow pynchna pynbha yeiwa emkaam kam wow chna ya ka Retaining Wall, ka Fencing wei wow pynmadan ya ka madan.
Hawa kyruiñ cha ka yakhun Final, ka Samasi FC da jop ko ya ka Mistery FC da 1-0.
Ka Samasi kam kawa jop da yoh ko leh wow rah ya ka song poisa kawa Rs. 1,00,000 katwa ka Mistery won kam kawa rem da yoh ko Rs. 50,000.
Ha kani ka pynhaap pyrda, neiliang ka Sports Committee ryngkat i ya krehlang wa ka Dorbar Dong Lumsashram da pynkupburom ko ya kiwa yalehke warim ka Dong kiwa da e lut yei bor hei yalehbol ha ki por wa dadep wow wanrah burom ya ka Club ha kitu ki por.
Kini kiwa da chah pynkupburom man ki kamni ha wah:
U Wom Chyrmang, u Saia Chyrmang, u Iaid Chyrmang, u Salan Syrti, u Shaw Syrti, u Rowell Syrti, u Plol Chyrmang, u Malum Chyrmang, u Kordon Chyrmang, u Hon Chyrmang, u Net Chyrmang wa u Goldstar Chyrmang.
Ya ka yalang da pynlai da u W. Chyrmang, Waheh Chnong Lumsashram.
Discussion about this post