Ka 4th Sumer League Football Tournament 2024 kawa pynlai da ka Sumer Socio Culture Sports Education and Entertainment Development Society deiwa krehlang waka Ams Entrepreneur Multipurpose Co-operative Society Ltd da poi ko cha wa kut ynnin ka sngi, heiwa da wan wow sakhi lang wa u D. Lamare kam u kongsan heithaw ka Santa Mary Shylla, MLA ka wym yoh u wan deiwa emlang u Krison Langstang MDC ka Sumer kam u symbood kongsan deilang wa kiwi kiwa chah khut sñiawbha.
Hachwa ka yaleh Final da em ka yalang wa pynlai da u President, u Begin LS Paslein, i klam wai phang da u Secretary, u Amnesty Salahe uwa da pynsñiaw yei thmu ka Society toh wow kyntu yei sap i phong ki khon khynroo khyllood ka thaaiñ ha ki liang waroh wei katkam wa man katni, ki kaam wa da leh toh kam ka Sumer Got Talent, ka U-18 Knockout Football wa ka bol ki seiñ kur wei dang em leh i thum wa daw pynmih ya chiboon ki jait yalehke kam wow pynchlur ya ki khon khynroo.
Da yoh leh i klam na u Maius Dhar uwa na Ratacherra, u Krison Langstang uwa man leh kam uwa e buit (Advisor) yong ka Society uwa da sneiñ da kyntu ya kiwa yalehke wa hawa yaleh toh u man kiwa jai jai ym hoi u em yei mynsien pynhiartput, heijooh i por leh da ong u wa sñiawkmen bha u wa em kam kani ka Society wa yoo jngai wa pynmih kam kini i jait pynyoo sap yow yoh thaw pynwyrngia ya ki khon khynroo neibhah lada ki khon khynroo kyruiñ khmat ki cha kam kini ki jait kaam wa bha daw lait na chiboon ki jait kaam wa sih, kamwa tip i wa ka i joor i drugs hapoh ka jylla yong i da yoo maa, tangwa deiwa em kam kini daw pynduna yei ngat ki khon khynroo hei drugs.
Neiliang u D. Lamare da ong u wa sñawkmen u wa em kam kani ka Society wei da kitbok kitrwiang u ya kiwa kitkaam ko yow man ki kiwa yaineh yoh u pynchlur ya ki khon khynroo hawa pynmih yei sap kiwa em ki, da ong u wa oo leh man u u bru wa maya bha ya ki kaam Sports wei man u leh uwa sñiawbang bha u kyntu wow pynku ya ka imlang sahlang, da ong u leh wa heipor wa nachwa ka yalehbol da kheiñ ya ka kam ka yaleh Exercise yow yoh yei doh i pran wa chait wa nang, tangwa ha ka juk wa katni da man ko kam ka laad wow kamai ja-kpoh lada pynemkaam hok yei sap.
Ya yalehke Final wa da pynman toh hapyrdi ka Paslein Combine FC Sumer Elaka pyrchah ya ka Suchiang FC Shangpung Elaka, heiwa ka yalehke da man ko kawa ya thaaiñ bha wei hadooh wa kut ka yalehke da kut ko da 1-1, kamtæ da pynman da ka yahcut Tie Breaker heiwa ka Suchiang FC da jop ko da 4-3.
Yei naam Top Scorer da yoh da yoh u Ebiang Paslein na ka Paslein Combine FC Sumer Elaka, yei naam Best Goalkeeper da yoh da u Mehi Suchiang na ka Suchiang FC Shangpung Elaka, yei naam Best Player da yoh da u Munshai Paslein na ka Paslein Combine FC Sumer Elaka.
Discussion about this post