Khliehriat: Ka lympung East Jaiñtia Hills District Super League 2019, wa pynman da ka East Jaintia Hills District Football Association (EJHDFA) dei kyrchaan u montri ka sorkar jylla, u Kyrmen Shylla da poi ko chawa kut ynne ha madan Dienchynrum heiwa u F.M. Dopth, Deputy Commissioner, East Jaiñtia Hills District da man u kam u kongsan.
Ha kani ka sngi pynkut da emlang u S.S. Syiemlieh, Addl. Deputy Commissioner, East Jaiñtia Hills District, u K. Passah, District Sports Officer, u Comingone Tlang, General Secretary, EJHDFA, u James Sutnga, Working President, EJHDFA wa ki dkhot ka Association.
U Robert Biam, Secretary Youth Development Committee, EJHDFA, da e u ya ki kyntien pdiang burom deiwa ekhublei leh ya u Kyrmen Shylla, Meghalaya Social Welfare Minister uwa da kyrchaan wow pynman ya kani ka lympung kawa jop.
U Dopth da ekhublei u ya ki ar dhab kiwa da poi cha ka Final yong kani ka lympung Super League deiwa kyntu ya waroh wow man ki kiwa kreh chitom la ha iwon iwon i jait yalehke.
Da ong u leh wa katkam wa man katni hapoh ka District ka kaam yalehke Sports emkaam wow pynku bha ya ka deiwa ong wa ki bor District yaleh ki wow pynkrehkaam ya ki Project wow pynku ya ki jait yalehke.
Da ekhublei u leh ya u Francis Swer na Khliehriat uwa da e sñiawbha 12 Acre wow chna ya ka Stadium ha District heiwa da pynkhreh leh ya ki kot ki sla wa emkaam.
Ha kani ka lympung da wan chimbynta 7 tylli ki dhab na wei ya ka Final da yaleh hapyrdi ka Khliehriat West FC pyrchah ya ka Sutnga SSCC.
Ka yakhun da kut ko khlem em wa ye u thap kool heiwa da pynman da ka chut Tie-Breaker heiwa ka Sutnga SSCC da jop ko da 5-4.
U Amul Chyrmang yong ka Sutnga SSCC da yoh u yei naam Man of the Match katwa yei naam Emerging Player Award da yoh da u Luckystar Muksor yong ka Khliehriat West FC wei ka Best Discipline Team won da yoh da ka Rymbai Wahshnong SC.
Ka Sutnga SSCC da yoh ko leh T. 1 lak katwa ka Khliehriat West SC da yoh ko T. 50,000.
Discussion about this post