Ka Tariang FC da jop ko yaka Final ka 8th Secondary School Invitation Football Tournament 2021-2022 wa pynman daka Dorbar Chnong Pdengshakap deiwa jop yaka Nohron SC da 2-0.
Ya ki kool ka Tariang FC da yoh u thap da u Badon Marbaniang haka minit wa 18 wa u Batipphar Swer haka minit wa 69.
Ha kani ka yakhun Final wada pynman ha kani ka 9 tarik da wan wow pynhaap pyrda yaka da u Lahkmen Rymbui, u Montri ka sorkar Meghalaya kam u kongsan deiwa emlang u Hering Shangpliang, Professional Coach kam u symbood kongsan, u Gillroy Tariang, MDC War-East, u Dapmon Tariang AFC Diploma Coach, u Donkupar Moksha SDPO Amlarem Sub-Division wa kiwi tawon ki waheh.
Ha chwa u sdang ka Final da em ka yalang wa tbian wa pynlai da u Savio Buam, Chairman Tournament, da yoh leh ya i klam na u Secretary chnong ka Pdengshakap u Shailang Pakyntein.
Ya i naam Man of the Match da yoh da u Debinroy Nongspung naka Tariang FC, yei naam Best Goalkeeper da yoh rah da u Aibormiky Suchiang naka Tariang FC.
Ka Tariang FC da yoh ko u rah yaka song poisa kawa T. 2,20,000 deilang waka Trophy, katwa ka Nohron SC da yoh ko u rah T. 1,30,000 deilang wa ka Trophy.
