Ka Ummulong CC da yoh ko wow rah yei naam Champion yong ka District Cricket League 2025 kawa pynman da ka West Jaiñtia Hills District Cricket Association (WJHDCA) ynne ha Khliehtyrchi Mini Stadium.
Ka yalehke wa da pynman toh hapyrdi ka Ummulong CC pyrchah ya ka Mowkaiaw CYC heiwa ka Ummulong da jop ko da 4 Wicket hadien wa jop ko ya ka kylla-khlem wei da jied ko wow kawang bol nyngkong.
Ka Mowkaiaw hawa kamai da yoh ko 102/9 na ki 20 Over deiwa kamai boon u Kishan Lyngdoh uwa da yoh 61 Run na ki 50 bol deiwa datlang ya 5 tylli ki 6 Run wa 4 tylli ki 4 Run. U Heimonlang Lyngdoh uwa kawang bol yong ka Ummulong da yoh u pynhaap 3 Wicket na ki 4 Over deiwa e u du 5 Run.
Ka Ummulong hawa kdong ya ka thong da yoh ko yei jop deiwa kamai 105 Run na ki 18.3 Over wei da dooh ko 6 Wicket. U Sylvester Mylliempdah da dat u 37 Run (Not Out) na ki 52 bol deilang wa 3 tylli ki 4 Run, u Chongtre I Man Lamare won da yoh u 28 Run na ki 17 bol deilang wa 3 tylli ki 6 Run wa kawi ka 4 Run. U Kitboklang Lyngdoh uwa kawang bol yong ka Mowkaiaw da yoh u pynhaap 3 Wicket na ki 4 Over, u Kishan Lyngdoh won da yoh u pynhaap 2 Wicket na ki 4 Over.
Yei naam Player of the Match da yoh da u Heimonlang Lyngdoh yong ka Ummulong uwa da lehbha da ka bol.
Yei naam Best Batsman yong kani ka League da yoh da u Devention Lyngdoh (235 Runs na ki 6 Innings) uwa yalehke ka West Jaiñtia Police CC.
Yei naam Best Bowler da yoh rah da u Heimonlang Lyngdoh (19 Wicket na ki 7 Innings) uwa yalehke ka Ummulong CC.
Yei naam Player of the League da lai cha u Devention Lyngdoh yong ka West Jaintia Police CC.
Ya ka yalang pynhaap pyrda ynne da wan wow sakhi da u Eddystone Shylla, President yong ka WJHDCA uwa da saam leh ya ka Trophy cha ka Ummulong.
Da emlang leh u Arwotki Sumer wa u Isaia Muksor, ki Vice-President, u Waiborlang Sohlang, General Secretary wa kiwi de ki dkhot ka Association.
Discussion about this post