Ka lympung yalehbol wa tip kam ka 1st Knock Out 10-A-Side Football Tournament 2022-23 kawa da pynlai da ka Youth and Cultural Sport Club Sohmynting da poi ko cha wakut ynne ka sngi da ka yakhun Final heiwa ka Unite Together FC (Sohmynting) da jop ko yaka Amlanai Young Boy (Amlanai) dei yachut Tie-Breaker.
Ka yalehke da man ko kawa yoosuk wei kawa chnongchit bha heiwa ka kylla step da kut ko khlem em wa yoh u thaw kool.
Ha ka kylla miet ka Unite Together FC lyngba u Figo Syndai da yoh ko wow thap kool ha ka minit wa 57 tangwa ka Amlanai Young Boy da kreh chitom ko wei da embhah ko wow yoh chi kool da kawa thap bakla uwa yalehke ka Unite Together u Teibok Lyngdoh haka minit wa 61 kawa da neh hadooh wa kut ka yalehke.
Kamtæ yow rai ya kiwa jop da pynman da ka yachut Tie-Breaker heiwa ka Unite Together da jop ko da 3-1 wei da rah ko leh ya ka song poisa kawa T. 1 lak katwa ka Amlanai Young Boy da yoh ko T. 50,000.
Yei naam Man of the Match da yoh da u Figo Syndai naka Unite Together FC.
