Ka West Khasi Hills District Cricket Association da jop ko da 28 Runhaka Final ka Inter District U-19 Girls Cricket Tournament 2021 wa pynman daka Meghalaya Cricket Association ha Nongstoin ynne ka sngi.
Ka WKH da jop ko yaka Tura District Cricket Association hanla em i 86 Run naka Player-of-the-tournament ka Sanchisa M Sangma.
Hawa Bat nyngkong hadien wa jop yaka kylla-khlem, ka WKH da yahkhmat yei kamai Run daka 51 Run naka Dubleen D Nengnong yow yoh 136/3 na ki 20 Over. Ki ar na ki le Wicket wa haap da yoh daka Sanchisa Sangma (2/28) waka Awesa G Momin (1/22).
Hawa kdong yei thong, ka Sanchisa da yoh ko aw jan 80% iwa kamai ka Tura tangwa da kut i kamai hadien wa yoh 108/2. Ki 86 Run da man i leh ka sien wa le ha ki le tylli ki yalehke wa ka Sanchisa da kamai ko palat 50 Run. Kiwa kawang bol ka WKH deiwa khapnap ki wow e Run da ye ki wow pynneh yeiwa kamai Run hapoh iwa emkaam ka Tura wow yoh.
Ha kani ka sngi da saam leh ya ki khusnam cha kiwa yaleh ka West Khasi Hills ka Nengnong (Player-of-the-match), Emisakani Warjri (Highest Wicket-Taker kawa yoh 9 tylli), ka Fenny Nongrum (Most Promising Player) wa kawa yalehke ka East Khasi Hill ka Monica Lyngdoh (Best Wicketkeeper). Najrong i naam Player-of-the-tournament, ka Sanchisa da man ko leh kawa yoh boon Run dooh deiwa yoh 256 Run. Daka bol da yoh ko 4 Wicket.
U kongsan ha kani ka sngi toh u MLA ka Nongstoin u Macmillan Byrsat deiwa emlang leh u MCA Vice-President u Dipul Ryntathiang, MCA Honorary Secretary u Gideon Kharkongor, MCA Joint Secretary u Chiang D Shira wa u MCA Treasurer u Drubajyoti Thakuria.
