Ka Lion Sports & Youth Affairs ka Lion Mission Compound Dorbar Chnong, ha ka thong wow kyntu kynrong ya ki khon khynroo khyllood wa em sap hei liang i rwai, i siaw i put i tem da khut pynman ko ya ka Rokustica Unplugged Music Competition 2022 wei da poi ko leh cha wakut ha ka 8 tarik uni u bnai.
Ha ka Grand Finale yong kani ka yakob wa da pynman ha Lion Mission Compound Dorbar Chnong Auditorium, u Wailadmiki Shylla, MLA Jowai dawan u wow emlang kam u kongsan chirup u Octomewot Lamin, Nominated MDC ka JHADC kam u symbood kongsan.
Haka yalang yahkhmat wa tbian yong kani ka janmiet hei pynlai u Donkupar Syngkrem, President LSAYA, u Pynhiam Kharkongor, Advisor LSAYA da e u i klam hajrong ka thong yong kani ka yalang katwa u L. Dauni Laloo, Secretary Rokustica da pachat u ki kyntien khublei.
Na pyrdi kiwa boon wa da yachimbynta ha kani ka Rokustica Unplugged Music Competition 2022, ki chiphaw tylli kiwa da psiah cha ka Grand Finale toh ki Meraki, ka Melodic Hues, ka Dawbhaki Pde, Saini Diang Bareh, The Hawk, Saiwansa Challam, Radiant Wave, Teibok Tongper, Audio Garde wa u Donean Laloo.
Ki le ngut kiwa bichaar wa stat wa chemphang yong kani ka yakob heiliang i rwai i siaw, i put i tem toh u Ram Suchiang, ka Amable Susngi wa u Starly Shullai.
Wow yoh kiwa bichaar u pynchongnia chong yurim yei sap yong kiwa yachimbynta ha kani ka yakob, da e laad wow rwai ki le tylli ki sur wei lyngba i stat wei chemphang yong kiwa bichaar, ki lok ki jor da yoh ki u sakhi ya kiwa chimbynta wa kynsai tam yong kani ka Rockustica Unplugged Music Competition 2022, ki tæ toh ka MERAKI wa da mihkhmat da u Byron Mandy Lamare, u Jobian Mandy Lamare wa u Mardy Pohdweng wei da yoh ki leh u rah ya ka song poisa wa T. 30,000 kam kiwa jop neitæ boodryngkhi ka Dawbhaki Pde wa emlang u Runi Philip Laloo kiwa da yoh u rah yaka song poisa wa T. 15,000, katwa ka Melodic Hues wa da mihkhmat da u Alexis Syngkrem, u Winifred Passah, ka Rilana Lawai, u Donald Syngkrem wa u Posperwell Dhar da rah ki yei naam Best Original Song.
