Ynne ka sngi hadien wa lai kjat wei chong kylleiñ myngngor ki soo ngut ki heh ka JYF wa JSM ha pchem ka yung krehkaam u Deputy Commissioner ka West Jaiñtia Hills wow dawa wow e Admission ya ki wym pu yoh thaw puræ Class XI kiwa em kamwa 150 ngut, neiliang u DC ka District da khut yaklam u ya ki heiyatoh wa ini.
Hadien i yachem neiliang u Jordan Rymbai President ka JYF Jowai Circle, u Ribok Biam President ka JSM Western Region da ong ki wa u DC da pyntip u wa ka sorkar da sdang ko wow thung ya kiwa sikai ha Kiang Nangbah Government College wei toh u kyrriah noh ki u chong kylleiñ myngngor ha ini i thaw.
U Ribok Biam da ong u wa ka sorkar toh u thung chwa ko ya kiwa sikai katkam wa emkaam neibynta kini ki khynnah ki wym pu yoh Admission, deiwa pynrap wa ka sorkar lada kwah ko ye bait ko wow leh yeiwa emkaam.
Hadien ini da rai ki wow pteiñ i chong kyllaiñ myngngor bait ha ini i thaw tangwa ki Magistrate da khang pyrchah ki yeini wei da phah ya ki pulit wow rah noh ya kini ki soo ngut na ini i thaw cha Jowai Police Station.
Heipor wa kyrriah ya ki da em i yaleh iwa neh chibet chipor.
Ki soo ngut kynthup ki ya u Jordan Rymbai President ka JYF Jowai Circle, u Ribok Biam President ka JSM Western Region, u Oswald Nampui President ka JYF Saipung wa u Wellson RD Siangshai uwa man kam u President ka JSM Eastern Region.
Hadooh wa pynmih ya kani ka khubor ympu tip ha kayi ka kyndon wa pynngat ya kini ki soo ngut.
