Ka yung krehkaam u District Sports Officer, West Jaiñtia Hills District deiwa ya krehlang wa ka yung krehkaam u Deputy Commissioner, West Jaiñtia Hills District, Jowai ynne da pynman ki ya ka Fit India Freedom Run 3.0-2022 wa da wan chimbynta da kiwa boon ki chynrang wa kynthai deilang wa ki khynnah.
Kani ka Freedom Run man ko leh kam chibynta i lehkmen dap 75 snem i yoh laitlooid ka ri (Azadi ka Amrit Mahotsav).
Da sdang yei phet na Main Gate ka Kiang Nangbah Stadium deiwa lai ter-ter u Ladthadlaboh Main Road-Jowai Public School-Salaroh-Dulong (Poh-Hali Road)-Dulong (Main Road)-Iongpiah-Panaliar-Old Civil Hospital-Le Kyrnah wei da pynkut ha u mot Kiang Nangbah (Syntu Ksiar).
Ha ka yalang saam khusnaam wa da pynman hakhmat u mot Kiang Nangbah da emlang leh u DSO ka West Jaiñtia Hills, u K. Passah, u Working President ka WJDSO, u EMH Passah, u Vice President, u Patrick Lamare wa kiwi de ki dkhot ka WJDSA. Neiliang u EMH Passah kam u kongsan da e mynsien u ya kiwa yachimbynta waroh wei da kyrsu kyntu u leh ya kitu kiwa poi chakhmat wow kreh chitom chooh chooh khnang yow ye u jop ya kiwi kiwi ki yakob.
Ka yakob phet toh kawa pynman khlem da kheiñ yei rta namo ka Open Category heiwa ha ki chynrang da yoh nyngkong u Dabit Dkhar uwa da pyndep yei phet heipor 30 minit wa 25 second, wa ar da yoh u Dasaman Kyndait uwa da pyndep da 30 minit wa 30 second wei hei wa le da yoh u Marso Kyndait uwa da pyndep deiwa chimpor 31 minit wa 7 second wei kini waroh le ngut toh kiwa na ka chnong Sabahmuswang.
Ha ki kynthai won da yoh nyngkong da ka Phyrnai Kyndait kawa na Mukhaialong kawa da pyndep yei phet da 41 minit wa 52 second, ka Dakani Shylla kawa na Caroline Colony, Jowai da yoh wa ar ko deiwa pyndep hei por wa 49 minit wa 17 second katwa ka Sambun Kyndait kawa na Mukhaialong da yoh wa le ko deiwa pyndep hei por wa 52 minit wa 47 second.
