Ynne ka sngi da man ko ka wow sahkynmoo ya ka ri India hadien wa kiwa yalehke Badminton da jop ki ya ka Thomas Cup ha ka sien wa nyngkong deiwa jop ya ka Indonesia kawa da dep jop ya kani ka lympung la 14 sien.
Ha ka yakhun Final kawa da pynman le tylli ki yalehke ha Bangkok, Thailand; ka India da jop ko da 3-0 ya kiwa yalehke ka Indonesia.
U Lakshya Sen dawan u nadien yow jop ya u Anthony Ginting da 8-21, 21-17, 21-16.
U Satwiksairaj Rankireddy wa u Chirag Shetty leh da wan ki nadien yow jop ki ya u Mohammad Ahsan wa u Kevin Sanjaya Sukamujilo da 18-21, 23-21, 21-19.
U Kidambi Srikanth da jop u ya u Jonathan Christie da 21-15, 23-21.
Neiliang u Union Minister ka Youth Affairs & Sports, u Anurag Singh Thakur da pynbna u ka song poisa kawa T. 1 klur cha kini kiwa yaleh Badminton ka ri. Ka Badminton Association of India (BAI) leh da pynbna ko T. 1 klur ya kiwa yalehke wa T. 20 lak cha kiwa kreh lang wa kini kiwa yalehke iwa da pynbna da u Montri Rangbah ka Assam u Himanta Biswa Sarma uwa man leh kam u President ka BAI.
Ki ri wa da jop ya ka Thomas Cup man ki kamni:
Indonesia- 14 sien
China- 10 sien
Malaysia- 5 sien
Denmark- 1 sien
Japan- 1 sien
India- 1 sien
Neiliang u Montri Rangbahdooh ka ri, u Narendra Modi da Phone syndon u cha kiwa yalehke yow e khublei ya ki hadien wa da wanrah burom ki ya ka ri deiwa yaroh leh ya ki wym em rem ki tang chisien leh.
