Jowai: Ha ka Result ka HSSLC wa pynbna ka MBoSE ynne ka sngi neibynta ka Science waka Commerce Stream, na ka St. Anthony’s Higher Secondary School, Shillong da mih pyrtuid 18 ngut ki khynnah wa puræ ko kam kiwa em ha ka Top Ten Merit List ha waroh ar Science wa Commerce Stream.
Ha ka Science Stream, ha ka Top Ten Merit da mih pyrtuid ki 11 ngut wei da yoh ki waroh nadooh wa nyngkong hadooh 10 lait noh kawa yoh ynru kawa na Don Bosco College, Tura.
Ha i kyrdan wa le ka St. Anthony’s da yoh ko ar ngut kamjooh ha iwa phra.
Ha ka Commerce Stream won da yoh nyngkong ka St. Edmund’s Higher Secondary School, Shillong katwa ka St. Anthony’s won da mih pyrtuid 7 ngut haka Top Ten Merit List.
Hapoh jylla waroh kiwa yaleh HSSLC (Science Stream) da em ki 3724 wei kiwa lait da em ki 2732 ngut iwa mut poi ki 74.58% iwa hiar naka 76.76% ynnin u snem.
Na waroh ki District, ka East Khasi Hills toh kiwa boon dooh kiwa yaleh kiwa da poi 2027 ngut wei kiwa lait toh 1678 ngut iwa man 82.78% iwa heh dooh na waroh ki District.
Ka District wa duna dooh kiwa lait toh ka South Garo Hills heiwa da em ki 18 ngut kiwa yaleh wei da lait du le ngut donhi iwa man 16.67%.
Ka West Jaiñtia Hills da yoh ko 79.21% heiwa kiwa yaleh da em 380 ngut wei kiwa lait da em ki 301 ngut.
Ha East Jaiñtia Hills kiwa yaleh da em ki 59 ngut wei kiwa lait toh 45 ngut iwa poi 76.27%.
Ha ka Commerce Stream waroh kiwa yaleh da em ki 2325 ngut wei da lait 2297 ngut iwa da poi 79.84%.
Na West Jaiñtia Hills kiwa yaleh da em ki 185 ngut wei kiwa da lait em ki 113 ngut iwa da poi 61%, katwa na East Jaiñtia Hills kiwa yaleh da em ki 54 ngut wei kiwa lait da em ki 41 ngut iwa mut da poi 75.93%.
Discussion about this post