Ka JAC kawa man ka satri ki seiñ ki tre Truck wa kynthup ya ka Jaiñtia Hills Truck Owner Association, Jaiñtia Hills Clinkers and Cement Association wa ka Meghalaya Truckers Union, ha ka 5 tarik uni u bnai da e por ko ya u DC ka East ka East Jaiñtia Hills wow ya pynbait wa ka seiñ ki karkhana pynmih khyndaw bilat ka All Jaiñtia Cement Manufacturers Association (AJMCA) yow pynkrehkaam noh yei dor kit mar wa thymme kiwa da booh da ka sorkar Meghalaya.
Neiliang ka AJMCA da mynjur ko wow pynkrehkaam ya i dor thymme wa da booh ka sorkar tangwa neiliang yong ki da ong ki wa u pynkrehkaam ya ini i dor du hapoh u pood u ang ka Meghalaya tangwa lada kit mar cha palat pood ka Meghalaya u lai katkam i dor yaw iwa mut wa lada ka Delivery Order toh yow kit mar na Meghalaya cha Assam, ym krehkaam i dor wa da booh ka sorkar.
Kamtæ ka JAC ynne ka sngi hadien wa kut i e por ya u DC heiwa ym ye wow yoh yeiwa dawa, ka JAC da pteiñ ko yei yakhih deiwa phah liwan yaki truck wa kit mar na ki karkhana pynmih khyndaw na East Jaiñtia Hills.
Hawa yaklam wa u Chairman ka JAC, u N. Tyngkan da ong u wa ynne ka sngi da sdang biang ya i yakhih neidaw wa ki karkhana pynmih khyndaw bilat ym pynkrehkaam ki yei dor wa thymme deiwa kyntu leh ya u DC wa u SP ka District wow pynchitom ya kini ki karkhana.
Ka JAC da pynchongnia ko wa ki mar toh kiwa mih napoh ka jylla Meghalaya, u sarok leh toh u yong ka Meghalaya, ki dan nadooh ka Road Tax toh kawa su cha ka Meghalaya kamtæ hawa lai luti hapoh Meghalaya toh u su katkam ki dor ka Meghalaya wei manda kaap cha Assam te su katwa em i dor leh ym phær. Tangwa i dor T.7 chi kilometre chi ton wa da booh ka sorkar toh u pynkrehkaam ya ka.
Ha ini i por wa pynman yaka yakhih da lai luti leh u montri rangbah ka jylla u Conrad Sangma uwa lai cha East Jaiñtia Hills heiwa ki dkhot ka JAC da yieñ ki harooh sarok deiwa rah Placard kiwa thoh ya ki ktien wow pteiñ yei yakhih yong ki hadooh wa yoh ki yeiwa dawa ki.
