Ka lympung yakura wa arsngi wa pynlai da ka West Jaiñtia Boxing Association (WJBA) da poi noh ko cha wakut ha ka 25 tarik ha Madan Daimasi, Ladthadlaboh, Jowai.
Ya kani ka lympung da tip kam ka 5th All Jaiñtia Open Boxing Championship wei ha kani ka sngi pynkut da wan sakhi lang u F.B. Basan, Additional Deputy Commissioner ka West Jaiñtia Hills District, u K. Passah, District Sport Officer ka West Jaiñtia Hills District deilang wa ki ki paidbah wa boon.
U F.B. Basan hawa klam da ong u wa ki bor District emlang bait ko chirup ha kiwon kiwon ki bynta wa emkaam yong ka imlang sahlang wei ka kaam Sport leh toh kawi na kitæ.
Kamtæ hawa yaroh ya ka West Jaiñtia Boxing Association, da pyn-ehbok pyn-ehnasib u leh ya kiwa yalehke deiwa ngait skem leh wa kani ka rynsan toh ka laad wa e myntoi heiyatoh wow em ka mynsien ya chimbynta wei mynsien yakhun.
Hadien wa kut ka yalehke da saam yaki khusnaam takma ksiar, takma rupa wa takma tama cha kiwa chimbynta ha ki kyrdan waphær waphær.
Da saam leh ka khusnaam wa chkeh tam napyrdi kiwa yalehke heiwa neiliang ki kynthai ka Dakahipaya Lyngdoh da yoh ko yei naam Best Boxer katwa ka Heiniwanki Nangbah da yoh ko yei naam Most Promising Boxer.
Ha ki chynrang won u Deibormitre Khonglah da yoh rah u yei naam Best Boxer katwa u Marleki Suchiang da yoh u yei naam Most Promising Boxer.
