Shillong: Ka United Democratic Party (UDP) da yoh ko wow ksoh biang ya ka chuki MLA na ka Shella Constituency ynne ka sngi da i jop em burom u kyrtong ka Party ha kani ka Election chiteiñ samoi, u Balajied Kupar Synrem da yoh u hadooh 12,002 Vote deiwa tam hadooh 6221 Vote ya ka kyrtong samen ka Grace M Kharpury kawa wan wa ar kawa yoh 5781 Vote.
Ini i jop yong u Balajied deiwa tam tput ya ki kyrtong wa yakhun pyrchah u man ko kawa sah kynmoo neibhah wot u pa yong oo uwa da khlaad noh, u Dr. Donkupar Roy ha ka Election MLA 2018 da jop u ya u kyrtong ka PDF deiwa tam du 370 Vote. Ini i jop da pynyoo ko leh wa ki paidbah ka Shella Constituency, dang chaniah ki yaka man yung u MLA wa da khlaad noh wei kamjooh ha ka UDP wow yahkhmat ya ka Constituency.
Hawa kyruiñ cha ka niaw Vote, u kyrtong ka UDP da tam u nadooh wa pynbna ya ka kylla kawa nyngkong haduh ka kylla kawa ynru, kawa pynyoo wa da yoh u yei jop na awjan waroh ki Polling Station ha katai ka Constituency.
Hadien wa pynbna ya ka kylla kawa le, ka kyrtong wa yakhun bha ha kani ka Election, ka Kharpuri da mih noh ko na ka thaw niaw Vote neidaw wa u Synrem da tam u hadooh 3365 Vote wei da sah sa le kylla wow niaw ya ki Vote.
Ya u Balajied Kupar Synrem u pynbaam smai noh pyn mynstep ka sngi kam u MLA wa pura da u Lamphang ka yung dorbar ha kamra krehkaam u ha i por 3:30 noh chariñ ka sngi.
Discussion about this post