Ka CoMSO kamwa da rai ko ha ka yalang yong ka wow sdang biang ya i yakhih wow dawa pynkrehkaam ya ka ILP wa ka MRSS Amendment Bill 2020 heiwa da rai wa ha ka 21 tarik u sdang i yakhih wow dawa leh wow pynbait ya u pood kamjooh wow dawa pynpsiah ya ka ktien Khasi ha ka Eight Schedule.
Hadien wa tip wa u montri ki kaam pohyung ka ri, u Amit Shah daw wan cha Shillong da rai noh wow pynman yakhih deiwa jaijai hadien wa da mih i kular wow yaklam wa oo hahrong ka ILP wa MRSSA.
Kamtæ ha ka 21 tarik ha waroh ki District Headquarter ka jylla daw pynman ya i thang mombati ya iwa daw khut “Ka Sngi Sngewsih ia ka Mynthi ki Korbarri” heiwa daw thang nadooh 3:00 i janmiet hadooh 6:00 i janmiet kani ka sngi.
Ha kani ka sngi daw pynman ya i suki wa 2 minit wow kynmoo ya ki bru kiwa da yaleh ya ka Hill State wei wow pynbood sa i thaab-kti wa 2 minit wow warom ya kiwa da yaleh ya ka jylla.
Kam wow pynkynmoo wa u Amit Shah daw wan u cha ka 69th Plenary Session yong ka North Eastern Council (NEC) kawa daw pynman ha Shillong ha ka 23 wa 24 tarik.
