Neiliang ka CoMSO ynne ka sngi da pynman yalang ko ha NEHU, Shillong heiwa da rai wow sdang noh da ki yakhih wow dawa na ka sorkar India wow pynkrehkaam noh ya ka ILP ha ka Jylla Meghalaya.
Ka CoMSO da dawa ko leh na ka sorkar Meghalaya wow wanrah biang ya ka Meghalaya Residential Safety and Security Amendment Bill 2020 kawa da pynuiñ da u lat ka jylla.
Ka CoMSO da ong ko leh wa ka sorkar India toh u burom ko ya ka Resolution ka Yung Dorbar Chna Aiñ ka Jylla wei ya i thrang i angnood ki paidbah ka jylla Meghalaya wow yoh noh ya ka aiñ yada ri ka ILP wei i pynslem yeini ymtoh neidaw wa dang puræ ya ka tangwa i wym em i mon (Lack of Political Will) deiwa pynrap leh wa lada kiwi ki jaitbru ha kiwi ki jylla em hok ki wow yada idæ lyngba ka ILP neiyi i daw won ha Meghalaya ym yoh ki ya ka?
Ka CoMSO da dawa ko leh na ka sorkar Meghalaya wa waroh ki MLA wa ymtoh u chong kli-kti donhi ki tangwa emkaam wow tynrooh wei wow pteiñ ki wow dawa yeini dei kyrmen wa ki MLA leh toh u yakhih ki wow dawa ya ka ILP wei ini ymtoh du ha yung dorbar.
Chooh chooh ka CoMSO daw pynman ko leh ya ka Black Flag Protest ha ka 27 tarik uni u bnai wei kamjooh leh ka Sit in Protest ha ka 4 Kmaichonglad (December) ha waroh ki District Headquarter ka jylla wow dawa ILP na ka sorkar India wei wow dawa biang na ka sorkar jylla wow wanrah biang ya ka MRSS (Amendment) Bill.
