Khliehriat: Ka Dorbar Chnong Umlyngsha da pdiang ko wa ka chnat Fishery Department, East Jaiñtia Hills District wow booh ya ka Fish Sanctuary ha ka Wah Sailynter kawa em hapoh ka chnong Umlyngsha neibynta i thmu wow pynneh pynsah ya ki dakha wa ki dohum ha kani ka wah.
Katkam ka khubor kawa da phah lyngba u Secretary Chnong Umlyngsha da mynjur ka Dorbar Chnong nadooh ka 13 tarik u Kmaichonglad (December) 2018 heiwa da mang poisa (Sanction) kawa T. 4 lak neibynta u chna ya ka Rest House wa ka Viewpoint harood kani ka Fish Sanctuary.
Chooh chooh u Secretary Chnong da khana u wa katkam wa man katni, ka chnong da em ko i thmu wow pynku ya ka kaam uiñke suwari hapoh yong ka thaaiñ neibhah ka chnong leh em ko chiboon ki thaw kam ka Synrang Sailynter Village Park wa kawi ka Krem Labit hajan yong ka chnong.
Kamtæ deiwa leh ya ini daw e myntoi ko ya ki paidbah ka chnong hadien habood.
Discussion about this post