Ka JAC kawa man ka satri ki seiñ wa kynthup ya ka Jaiñtia Hills Truck Owner Association, Jaiñtia Hills Clinkers and Cement Association wa ka Meghalaya Truckers Union ha ka General Meeting wa man ynne ka sngi ha Phramer da iwi i sur da rai ko wow pynman da ka yakhih wa khlem kut por namo ka Indefinite Strike hajrong i wym pynkrehkaam ki karkhana pynmih khyndaw-bilat (Cement Factories) ya i dor wa da booh da ka chnat Transport Department ka sorkar jylla.
I dor wada booh da ka sorkar jylla ha ka 25 Naikhynde (September) 2020 lyngba ka Notification NO.TPT.91/80/813 da pynthymme noh ko ya i dor bai kit mar ki truck itæ T.7 hadooh T.11 chi kilometer chi ton ha ki sarok psiang, T.8 hadooh T. 12 chi ton chi kilometer ha ki sarok moo wei T. 10 hadooh T. 12 chi ton chi kilometer ha ki sarok khyndaw.
Kam wow pynkynmoo ka JAC da dep booh ko da ka dorkhat ha u Deputy Commissioner ka East Jañtia Hills District ha ka 21 tarik u Naichiphaw wei neiliang yong oo da pynmih u ya ka hukum (Order) lyngba ka chithi EJHD/GEN/TRAN-4/Vol-IV/2019/169 kawa da pynmih ha ka 25 Naichiphaw heiwa da phah ya ki karkhana wow pynkrehkaam noh ya i dor wa da booh ka sorkar.
Ka JAC hadien ini da yoo ko wa neiliang ki karkhana ym pynkrehkaam ki ya ini i dor wei dei wym yohsa de wow pynman da ka Indefinite Strike deiwa khang pyrchah ya ki karkhana wow phah kit (Load) ya ki kari yong ki kat wympu su ya i dor wa thymme.
Kani ka Strike toh du neibynta wow pyrchah ya ki kari ki karkhana kiwa kit khyndaw-bilat wa Clinker.
Kamtæ da kyntu joor ka JAC ya ki tre truck wa ki paidbah wow yakrehlang wei wow kyrchaan ya ka seiñ ha ka 5 tarik uni u bnai neibynta wow pynkrehkaam ya kani ka hukum neibynta i hok yong ki.
