Jowai: Ynne ka sngi ka Joint Action Committee (JAC) kawa da chong ya ka yalang wa jhan (Emergency Meeting) ha Phramer, West Jaiñtia Hills da rai ko wow sangeh chwa yei yakhih yong ka iwa da sdang nadooh ka 15 tarik uni u bnai deiwa dam u kit ya ki mar (Clinker wa khyndaw-bilat) na wei cha ki karkhana pynmih khyndaw-bilat wa em ha East Jaiñtia Hills.
Yeini da rai hadien wa yoh ka JAC ya ka chithi na ka sorkar wa daw pynman ko ya ka yalang ha ka 25 tarik uni u bnai heiwa u montri rangbah ka jylla, u Conrad Sangma daw man u kam u chongknor hei emlang u montri ka chnat Transport, u Sniawbhalang Dhar wow yaklam hajrong i dor bai kit mar wa thymme wa da booh ka sorkar.
Kam wow pynkynmoo heini ka JAC kynthup ko ya ka All Jaiñtia Cement And Clinker Transporters Association (AJCCTA), ka Jaiñtia Hills Truck Owners Association (JHTOA) wa ka Meghalaya Truckers Union (MTU) wei da dawa ko wow pynkrehkaam ya ka hukum ka sorkar jylla wa da pynmih ha ka 13 Duyatra uni u snem wa pynthymme yei dor bai kit mar ki truck.
Hadien ka yalang, hawa yaklam wa u Nehemayah Tyngkan uwa man u Chairman ka JAC da pyntip u wa da rai wow sangeh chipor yeini i yakhih hadooh ka 25 tarik uni u bnai kawa man ka sngi wa khut yalang ka sorkar dei kyrmen u wa ka yalang u man ko kawa mih soh mih sla.
Heiyatoh wa i chah pynbaad wa em kiwa yah truck kiwa chah dat wei i chah dat moo ki truck ha ini i yakhih, neiliang u Nehemayah Tyngkan da pyntip u wa i yakhih ka JAC da man i iwa jaijai wei ymtip ko iyi iyi hajrong ini i jia.
