Ka Jaintia Students’ Union-Central Body da beiñ joor ko yei sait-khooid u EM Incharge Taxation ka JHADC, u Winning G Sungoh ha ka 15 tarik uni u bnai wa i pynbaad ka seiñ man i iwa bakla.
Ka seiñ da ong ko wa phylla ko wa kat u EM Incharge ka chnat Taxation ymtip u ya ka soskular hapyrdi ka Council wa u Leasee namo uwa chimwai ya ki thaw khrong dan ka Council.
Da ong ko wa katkam ka soskular ka Council da ewai ko ya ki Check Gate cha uwi u briew wa tip kam u Eddy Stone Shylla neibynta le snem hei dor T. 32 lak heiwa uwa chimwai u khrong u T. 200 na kiwa biang ki kot ki sla katwa ki wym biang ki kot ki sla ka Council u daiñ kuna ko ym duna T. 1000 kawi ka kari.
Neitæ i daw ka Council da haap booh ko ya ki wakreh yong ka ha kini ki Check Gate kam ki Enforcement wa ki Inspector, da kam ka JSU.
Ka seiñ da ong ko leh wa lada jia kamwa ong u EM, wa ya kini ki Check Gate da e wai na dong cha dong cha uni uwa chimwai wow kynreh kot ya ki truck wa lai wa wan wei wow chim T. 200 kawi ka kari, mut i wa kitu ki wym biang kot kammon u leh ya ki? “Heini pynyoo i wa ka Council lyngba ka chnat Taxation Department da e wai lut ko wot ya ki aiñ ka Council cha uni u bru neibynta le snem. Lada kamni i thmu ka JHADC wow booh ya kini ki Check Gate kammon u ye u pynmih poisa ka Council.”
Da kylli ko leh iyi u myntoi ya ka Council wow booh bru ko ha kini ki thaw heiwa da ewai lut cha uwa chimwai wei ini pynyoo che i wa u EM wa ksoh ya kani ka chnat Taxation ympu biang u wei emkaam wow hiar noh u na ka chuki.
Neiliang ka seiñ da pynkynmoo ko wa ha ka dorbar ka Council wa da man ha ka 15-04-2020 uni u EM da jubab u yeiwa kylli u A. Shullai, uwa yahkhmat ya ka liang pyrchah heiyatoh wa ki kari wa da ksoh ha ki ar tylli ki Check Gate (Mookyndur wa Ratachera-Umkiang) kiwa em 21,019 tylli nadooh 1 Naiynñiaw 2019 hadooh 29 Thohlakhmi 2020 wei ka kuna nadooh ka 1 Naikhynde 2018 hadooh 29 Thohlakhmi 2020 man ko T. 4,83,300. Kamtæ ka seiñ da kylli ko wa ya ka poisa wa yoh na ki Check Gate kawa T. 4,83,300 toh kawa e uwa chimwai na katai ka T. 32,00,000 namo wa ki bru ka Council da ksoh ki na ki truck ki wym biang ki kot ki sla mo?
Kamtæ ka seiñ da rai ko wow ujor cha ka High Court khnang wow ye ko u bichaar hok khnang wa ki paidbah ka Ri-loom Jaiñtia u che ki.
Hejooh i por ka seiñ da dawa ko na ka Council wow pynman da ka yania paidbah namo ka Public Debate hajrong ini waroh.
