Ka Khasi Hills Autonomous District Council (KHADC) da rai ko wym mynjur la kammon kammon wow e No Objection Certificate (NOC) neibynta wow wanrah ya ka luti rel hadooh ha Byrnihat. Ya ini i rai ka KHADC da chim hadien wa ya syllok lang leh wa ki khlieh synchaar wa kynthup ya u Syiem ka Raid Marwet wa ki Basan ka Raid Nongkseh, Ummulong ha ka yalang kawa da man ynne ka sngi Thohdieñ.
Hawa klam cha ki laad pathai khubor, u Chief Executive Member ka KHADC, u Titosstarwell Chyne da pyntip u wa ka sorkar wa da phah chithi ko hadooh 11 sien wow pynkynmoo ya ka KHADC neibynta wow wanrah ya ka luti rel nadooh Tetilia cha Byrnihat.
Da pyntip u wa da boon snem ka sorkar da paan bor ko na ka KHADC wow pynman kaam ya ka luti rel, tangwa na ka Council da dep wow klam che wym pdiang wow e bor neibynta ka luti rel, wei neiliang ka sorkar da thoh ko hadooh 11 sien ka chiti cha ka KHADC, kawa da pynman wow khut ya ki khlieh synchaar waroh, heiwa da mynjur lang ki wym mynjur u wanrah ya ka luti rel, wei da pyntip wa ya kani ka rai daw phah leh dei thoh cha ka sorkar jylla.
Hawa kylli, da ong u wa ka KHADC ka em ko neibynta ki tre ri, wei katkam i sñiaw yong ki paidbah man ko ka wym pu kwah ya ka luti rel neibhah wa em i maa nei wan ki bru kiwa na baar wei da pynrap wa lada wan ka rel, kam ka jaitbru kawa khian daw chah tlep noh. Da ong u wa ya katni ka KHADC ym klam ko ya ka rel khian namo ka rel kit bru, tangwa wow pyrchah bait yaka luti rel.
Katkam i pyntip u CEM wa ka thaw wow chah ktah nei thmu wow wanrah ya ka luti rel toh kamwa 47,673.63 sq/m, kawa haap nadooh ka chnong Pahamlang cha Ronghona wei em kamwa 16 ngut ki tre thaw.
